Такъва
ТIадегIанав Аллагьасдаса ﷻ хIинкъиялъул рахъалъ гIадамал батIи-батIиял макъамазда рукIуна. Цо-цоязда ккола гIицIго как бани, кIал ккуни гIолин абун. Амма Бичасул Расулас такъва (Аллагьасдаса ﷻ хIинкъи) рекIелъ букIунин загьир гьабуна.
ГIумар бин ГIабдулгIазизица абуна: «Такъва, ай Аллагьасукьа ﷻ хIинкъи гIицIго къад кIал кквей, къаси сардилъ какал рай гуро. Такъва ккола Аллагьас ﷻ хIарам гьабураб тей, Аллагьас ﷻ тIадкъараб тIубай. Гьелдаса хадуб лъикIлъиялъе ризкъи кьурасе, лъикIлъиялда тIаде лъикIлъи щварав чи ккола», - ян.
Исламалъул ункъабилев халипа ГIали бин Абу ТIалибица абуна: «Дунялалъул тIадегIанал чагIи ккола сахаватал гIадамал. Ахираталъул тIадегIанал чагIи ккола такъва бугел гIадамал», - ян.
Ибну ГIатIаиллагьица абуна: «Такъва ккола загьиралъул гIорхъаби цIуни, батIинияб рахъалдасан ккола ниятги ихласги», - ян.
Такъваялъул бакI ракI ккола. Гьениб кинаб такъва бугебали цохIо ТIадегIанав Аллагьасда ﷻ гурони лъаларо.
Шайих Сагьлуяс абуна: «Такъва дуе букIине бокьани, киналго мунагьаздаса рикIкIалъе», - ян.
ЖакъагIадинаб гIемер пасалъи тIибитIараб заманалда нилъ цIакъго хIажат руго такъваялда тIад хIалтIи гьабиялде. Амма нилъеца щварабщинабги кваналеб бугони, кинха гьеб цIикIкIинеб?
МугIаз бин Жабалица абуна: «Такъва нахъе уна хIалалаб жо течIебгIан заманалда, ай хIарамаб жоялде ккезе гурин хIинкъун».
Цере рукIарал гIалимзабаз рухIияб рахъалда, ай ракIалда тIадчIей гьабулаан. Гьез хIалалал жалцин толаан, хIатта кванилъцин, хIарамаб батизе гурин хIинкъун. Нилъер гIамалалин абуни гIаксалда руго. ХIарамаб жо кваналеб батула якъинго лъалеб бугониги ва гьелъул кIварги гьабуларо.
Гьединго нилъ зигардула берцинго как базе, тIагIат гьабизе бажарулеб гьечIин абун. ГIасилъиялда ругел, хIарамаб жо кванарал лугбал, бацIцIадаб тIагIат гьабиялъе мукIурлъуларо.
Аллагьас ﷻ щивасе тавпикъ кьеги такъва цIунизе.
