Жакъаго пайда босе
ТIадегIанав Аллагьас нилъее гIемерал сайгъатал кьун руго. Гьезие гIоло нилъеца БетIергьанасе реццги гьабун, рихьизарураб гьабураб куцалда гьел хIалтIизаруни, щивасе дунялалдаги ахираталдаги кIудияб пайда щвела.
Бокьараб нигIматалъухъ инсанас ТIадегIанав Аллагьасе шукру гьабуни, Гьес нигIмат жеги цIикIкIинабула ва кириги хъвала. Хирияб Къуръаналда буго (магIна): «Нужеца (кьурал нигIматазухъ) шукру гьабуни, Дица жеги цIикIкIинабизе буго…», - абун (сурату «Ибрагьим» 7 аят).
Ибну ГIабасидасан бицун буго Аварагас ﷺ абунин: «Нужеца щугоялдаса пайда босе цоги щугоялъ гьеб хисизегIан: гIумруялдаса хвел тIаде щвелалде, сахлъиялдаса унтизегIанго цебе, эркенаб заманалдаса машгъуллъараб мех тIаде бачIиналде, гIолохъанлъиялдаса херлъи щвелалде, бечелъиялдаса мискинлъилалде цебе», - абун (Байгьакъи). Гьелдалъун Аварагас ﷺ нилъ ахIулел руго метерисеб къоялъул ургъел гьабичIого, жакъа кьун бугеб ресалдаса пайда босиялде. Пайдаги босичIого гIадада жакъасеб къо тIамиялдалъун нилъ хутIизе руго доре-гьанире руссун, кире инелали лъаларого, гIицIаб гIалахалда хутIарал кинниги. Гьеб мехалда кватIун ккола.
Нилъеца анищ гьабулеб букIуна метерисеб къоялъул, майин абун кьураб жакъасеб къоги бихьуларого. БукIуна аралъул ургъел гьабулеб, бачIине бугелде хьул лъолеб мех. Аллагьас нилъехъе кьун буго багьа тIокIаб заман ва гьелдаса пайда босунгутIи ккола шукру гьечIолъи.
Цогидаб хIадисалда буго: «КIиго нигIмат буго гIемерисез тIаса-масаго толеб, гьебги ккола сахлъи ва эркенаб заман», - ин (Бухари).
Нилъеца хасаб кIвар кьезе ккола гIумруялъул араб заманалдаги букIинеселдаги гьоркьоб бугеб лахIзаталде. КIвар гьечIого ине тани, нилъ махIрумлъизе рес буго абадияб рукъалъул талихIалдаса.
Жакъасеб къоялъул кIвар цIикIкIун гьабуни, нилъ рукIине руго бугелда шукру гьабулел, Аллагьасул къадаралда жеги лъикI божилъи-иман бугеллъун. Рекъараб гьечIо, кIиго гIанкIида хадурги рекерун, нух бикьуда эхетун хутIизе.
Жакъаселъул ургъел цIикIкIун гьабулев лъугьине вуго хIадисалда Аварагас ﷺ рехсей гьабураб щуябгоялдаса пайда босулевлъун. Гьесие бигьалъизе буго нахътIамун течIого лъикIал гIамалал гьаризе, тавбуялда даимлъизе, гIужда гIибадат гьабизе, гIагарлъиялъулгун бухьен кквезе, сундулъго БетIергьанасде таваккал тIамизе.
Аллагьас кумек гьабеги! Амин!
