Инсан берцин гьавулеб
БетIергьанас инсанасулъ лъун буго кIиго жо, цояб цоялъе тушманлъунги бугеб. Гьелги руго квешалдалъун амру гьабулеб напсги, багьа тIокIаб жавгьарлъун бугеб гIакълуги. ГIакълу буго инсанасул гIумру берцин гьабулеб гвангъараб нур. Напс буго кидаго квешалде рачине бокьулеб, гьабулеб ишалъулъ кIвахIалаб.
Ибну ГIабасица бицараб хIадисалда буго: «Щибаб жоялъе буго алатги хIадурлъиги, муъминзабазул алат гIакълу буго. Щибаб къавмалъеги буго рагIа-ракьан, гIибадат гьабулезул рагIа-ракьанги гIакълу буго», - ян.
ГIакълу битIун хIалтIизабизе лъани, гьелъ инсан вачуна БетIергьан лъаялде, Гьесие букIине кколедухъ гIибадат гьабиялде. ЛъачIони, напс гьоркьоб хIалтIун, гьелъ инсан цIала пашманлъиялде ва ахир талихIкъиналде. ЛъикIаб рахъалде гIакълугун пикру хIалтIизабизе лъалев чи Аллагьасе гIибадат гьабулевлъунги вуго.
Аварагасул хIадис бугелъул: «ТIадегIанав Аллагьас бижараб махлукъаталъул пикруялда цо сагIаталъ вукIин тIубараб соналъ гIибадат гьабиялдасаги хирияб буго», - ян абураб (Абугьурайрат).
ГIумар-асхIабас бицараб хIадисалда буго: «Чияс жиндир гьалмагъ битIараб нухда тIовитIиялъулъ яги квешалдаса нахъчIваялъулъ гIакълуялдаса хирияб жо хIалтIизабичIо. Иманги цIубачIо, динги битIараблъун лъугьинчIо чиясул гIакълу камиллъизегIан», - ян.
Берцинал тIабигIатаздалъун чи гIибадатгIамал гьабулесда нахърегIула, амма гьел тIабигIатал гIакълу камиллъизегIан цIубаларо. ГIакълу камиллъидал иманги тIубала, Аллагьасеги мутIигIлъула. Ибну Мубаракида гьикъидал: «Аллагьас кьолел нигIматазул бищун лъикIаб щиб бугеб», - абун, гьес жаваб гьабун буго гIакълу кколин.
ГIакълуялъ хIакъикъат халгьабула ва рекIелъе гьеб рехизеги хIаракат бахъула, амма ракI бугони дунявиял ишазде машгъуллъун, гьез цIураб, гьеб мехалъ гIакълуялъе захIмалъула. Дунявиял тIалабаз ракI асир гьабидал гIакълуялъги гьабулеб кумек дагь гурони букIунаро. Гьединаб хIалалъулъ тIадчIей гьабизе ккола паризаял жал мухIкан гьариялда, гIемер Аллагь рехсеялда, аварагасде салават битIун суннатаб гIамал гьаби гIадал жалазда. Хадуб, дагь-дагьккун гIакълуялъеги бигьалъула рекIее дару гьабизе.
«Дин буго гIакълу. ГIакълу гьечIесул динги гьечIо», - ян буго хIадисалда. Гьединлъидал Аллагьас насиб гьабеги щивасе камилаб гIакълу ва гьеб БетIергьан разилъуледухъ хIалтIизаби! Амин!
МУХIАММАДГIАРИФ КЪУРБАНОВ, «АС-САЛАМАЛЪУЛ» МУХБИР
