Аллагьасул ﷻ нухдаса кьурана
Аллагьасул ﷻ нухдаса кьурана
ТIадегIанав Аллагьас ﷻ инсан вижана бищун берцинаб къагIидаялда ва тIолабго гIаламалда гьоркьоса кIодоги гьавуна. Аллагьас ﷻ гьев камилги гьавуна гIакълу-пикруги кьун. Дунялалда бугебщинаб санагIалъиги гьесие бижана. МугIрул, ракьал ва гIорал гьесие мукIур гьаруна. ЛъикIаб, бацIцIадаб, пайда бугеб жо кваназеги ризкъилъун кьуна. Гьеб кинабго кьуна ТIадегIанасул ﷻ аманат ва шаригIат кквезе букIине.
Кинабго жо бижарав Аллагь ﷻ вуго ва гьелъие къанун чIезабулевги цохIо Аллагь ﷻ гурони гьечIо. Инсанасда тIадаб жойин абуни ккола Аллагьасул ﷻ амруялда нахъвилълъин ва Аллагьас ﷻ гьукъараб тей. Гьеб аманат инсанасда ракIалде щвезабизелъун Аллагьас ﷻ ритIана аварагзаби Жиндирго рахIматалдалъун. ТIоцеве витIана Адам авараг ва ахиралда - МухIаммад ﷺ авараг.
Адамил ва Идрисил заманалда халкъ букIана цо гIакъида ккураблъун. Хадуб гьезул гIибадаталда ва гIакъидаялда жаниб ширкги куфруги баккана. Гьеб мехалда баккана гьезда гьоркьоб хилафал ва хъанчазе лагълъи гьабизе байбихьана. Цинги Аллагьас ﷻ НухI авараг витIана гьезухъе. Гьев ккола капурзабазухъе витIарав тIоцевесев авараг.
Къуръаналда буго (магIна): «ГIадамал рукIинчIо цохIо умматлъун гурони, хадуб хилаф ккана», - ян (сура «Юнус», аят 19).
Ибну Касирил тафсиралда буго, гьелъул магIна кколин ширк бакканин гьечIеб бакIалдасаян абураб. Гьеб баккизегIан халкъ букIана цо диналда, ай Исламалда.
Ибну ГIабасица абуна Адамидаги НухIидаги гьоркьоб анцIго гIасру букIанин абун.
НухI аварагас дагIват гьабула гIемераб заманаялъ. Жаваб гьабуларо цIакъ дагьал гIадамаз гурони. Аллагьас ﷻ гьел гъанкъизарула ва хвасарлъуларо гамида рекIарал чагIи гурони. Гьеб гама Аллагьасул ﷻ амруялдалъун НухI аварагас гьабула 40 соналъ. Лъим гьечIеб бакIалда гама гьабулев НухIида тIад гьенир ругел гIадамал релъанхъула. Аллагьасул ﷻ хIукмуйин абуни букIана гамида рекIарав чи гурони хвасарлъунгутIи.
Гамида рекIарал чагIи рукIана иман лъурал гIадамал ва гьезул вукIана 80-гIанасев чи. Гьенир рукIана бихьиналги руччабиги бащадго. Гамида рукIана НухIил лъабго васги ва лъудбиги. ГIадамазул наслу гъанкъун хадуб, хутIараб бачIана НухIил лъималаздасан.
НухI авараг Къуръаналда рехсон вуго бищун гIемерал сонал рарав чи хIисабалдаги.
