ВатIан бокьи
ВатIан бокьуларин абуларо цIодорав чияс. Аварагасги ﷺ жиндир гIумруялда жаниб бихьизабуна ватIан, живго гьавураб бакI, ай Макка бокьулеб букIараб куц. Маккаялда бусурбабазда тIад зулму гIемерлъидал, гьижра гьабулеб мехалъ аварагас r абула Маккаялдехунги вуссун, дур агьлуялъ дун къватIиве вахъинавулев вукIинчIебани, вахъине вукIинчIин. Гьелъ баян гьабула ватIаналъ гьесул рекIелъ кинаб бакI кколеб букIарабали.
Жакъа гIажаиблъизе бачIуна цо-цо гIадамазда, масала Турциялда гIумру гьабизе рачIаян жидеца абулезда. Гьел кутакал чагIийищ кколел, щивав чиясул хIакъ тIаде босулел? Гьениве гочаразул гIумру хвани, щиб гьабизе бугеб? Гьединлъидал насихIат гьабиги гьединал гIадамазул хIакъ тIаде босиги бигьаяб жо гуро. РагIи абизе ккола цIакъго ургъун.
ГIалимзабаз абула:
«ВатIан бокьи тIабигIалда жанибго буго. Киве кканиги ватIаналдехун гIищкъу бачIуна», - ян. ХIакъикъаталдаги хIежалде аразги абула кигIан лъикIаб бакI доб бугониги, ватIаналде ракI цIалин абун.
Тавраталда хъван буго:
«Я Адамил лъимер! Сапаралъ вахъани, дуе Дица ризкъиги бижизабила», - ян. Цо-цо сапаралъе рахъинчIогоги тIураларо. Цо нухалъ пуланав чиясда цIехола талихI щиб жойилан? Гьес абула: «Аллагьас ﷻ кьураб жоялда гIей гьабун чIей, гьебги ватIаналда вукIаго», - ян. Гьединго бицуна Искандер абурав ханас жиндирго меседил алатал Рималде росеян васият гьабунин, ай ватIаналде рокьи букIиналъ. Сапаралъ вахъиналда жаниб пайда бугинги абула, ай черх багъаризабулеб букIиналъ. Цого бакIалда вагъаричIого чIеялъулъ зарал букIуна. Аллагьас ﷻ цIунаги нилъер ватIан киналниги балагьаздаса.
ШАМИЛ МУХIАММАДОВ
