ГIемер букIин гуро
Диналъ нилъ ахIула лъикIлъи гьабизе, вацлъигун гьудуллъи щула гьабиялде, цогиязул хIал бикьун ургъелал гIахьал гьари гIадал гIамалазде. Гьел гIамалазда гьоркьобе уна садакъа-хайрат гьабиги. Гьеб гIамалги буго жинде БетIергьан Аллагьасгун ﷻ хирияв Аварагас ﷺ нилъ ахIулеблъун. Хирияб Къуръаналда буго (магIна): «Нижеца ризкъилъун кьуралдаса нужеца напакъаде жо кье…», - ян (суратул «Мунафикъун», 10 аят).
Абула садакъа Алжаналда аслу жиндир бугеб ракьалде дализабураб гъотIол мисалалда бугин, гьелъул гъаркьалабазда хурхине тIалаб гьабун щив чи вугониги гьелъ гьев Алжаналдеги вачунин абун. Гьебго гъветIалда релълъинабун буго къарумлъиги, жиндир аслу жужахIалдаса бугеб, гьелда хурхине къасд гьабурав гьелъ жужахIалдеги цIала. Аварагас ﷺ абун буго: «Муъминчиясул садакъаялъ гьелъул бетIергьанасдаса дунявиял балагьал, хабал питнаби, Къиямасеб къоялъул гIазабал нахъчIвала», - абун.
Сахаватлъиялъулгун садакъадул бицунелъул, бачIинахъего ракIалда бачIуна, гьеб кколин боцIи-мал гьелде хIажатазе кьейин абураб жо. ХIакъикъаталдайин абуни садакъа гIицIго боцIи-мал кьеялда къокъун букIунаро. Тирмизиясдасан нилъехъе щвараб хIадисалда буго: «Мун бусурбанчиясдехун гьумер битIун кIалъай – садакъа, лъикIалде цогидал гьесизари ва гьукъаралдаса гьел кантIизари – садакъа, нухда мекъи ккарав витIизави – садакъа, канлъи загIипасе кумек гьаби – садакъа, нухдаса гамачI, заз-хъарахъ, ракьа гIадаб жо (гьенисан хьвадулезе квалквал гьабулеб) нахъе рехи – садакъа, дурго цIарагIалда жаниб бугеб лъим, диналъул вацасулалъубе тIей – садакъа», - ян. ХIадисалда рехсаразда релълъарал гIемерал гIамалал руго, Аварагасги ﷺ гьарулел рукIани абун, нилъеца тIуразаруни кири хIасуллъулел, цинги жалги садакъалъун ратулел.
«Нужеца жужахIалъул цIаялдаса цIуни гьабе бащдаб чамасдак садакъаде кьунги, гьеб гьабизе рес батичIес лъикIаб рагIиялдалъунгIаги гьабе (садакъа)», - абун буго Бухарияс бицараб хIадисалда. Гьелдаго релълъун буго аскIов гьечIев диналъул вац лъикIалдалъун рехсей, цогидаздаса жиндие ккараб зулму-зарал тIаса лъугьун тей, унтарасухъе ваккизе ин, хварасул жаназа тIобитIи гIадал шаргIалъ тIуразаризе рихьизарурал цогидал гIамалалги. ХIадисалда буго: «ШаригIаталъ бегьизабураб щибаб гIамал гьабиги садакъа ккола», - абун (Муслим).
Аллагьас ﷻ къабул гьабеги гьабураб лъикIаб гIамал! Амин!
