ЖамагIаталда как
ЖамагIатгун мажгиталда как баялде шаригIаталъ кIвар кьола. Гьедин бараб какалъул кириги 27 нухалъ живго цохIо как баялдасаги цIикIкIун букIуна. ГIемер халлъула жамагIат-какде кватIулев вугев чи гьениве векерун унев. ГIемерисезда ккола гьеб беццараб бугин абун. Гьайгьай, гьелъул гIаксалда буго. ЖамагIат-какде унев чиясе, имамас салам кьелалде гьениве векерун гурони щолареблъи лъалеб бугониги, беццараб буго гIодове виччан, берцинго ине.
Абу Къатадатица бицана: «Цо нухалъ авараггун ﷺ как нижеца балаго рекерун какде рачIунел гIадамазул сас рагIана гьесда ﷺ. Как бан бахъиндал аварагас ﷺ цIехана: «Нужее ккараб щиб?» - илан абун. Гьез жаваб гьабуна: «Какде щвезелъун гIедегIун рукIана ниж», - илан. Цинги аварагас ﷺ абуна: «ТIокIалъ гьедин гьабуге. ГIодоре риччан, берцинго а какде. Нуж хадур гIунтIарав имамгун бай, хутIараб тIадеги бацIцIе», - ян. (Бухари)
Абу Гьурайратидасан бицана: «Бичасул Расулас ﷺ абуна: «Къаммат гьабун хадуб нужер цонигияв какде векерун унге! ГIодоре риччан, гIедегIичIого а какде. Нуж хадур гIунтIарав имамгун бай, хутIараб тIадеги бацIцIе», - ян. (Муслим)
Гьелдасан босун, мажгиталде жамагIат-какде унев чиясе, имамасда цадахъ балеб как борчIун кколеб букIин лъаниги, лъикIаб буго векеричIого, берцинго ине. Абу Гьурайратидасан бицараб цогидаб хIадисалда буго: «ЖамагIатгун как мажгиталда базе ниятгун унев вугев чи гьениве гIодове виччан а. Щайгурелъул гьев какилъ вугеб хIал букIуна. Имамгун цадахъ базе щвараб какил бутIаги бан хутIараб тIаде бацIцIе», - ян.
РекеричIого, гIодоре риччан иналъул хIикмалъи бицун гIалимзабаз абуна: «Какде чи векерун унаго гьев свакала ва кIвахI тIаде бачIуна. Гьеб хIалалда бараб какилъ хIузур цIунизеги захIмалъула. ГIодове виччан арасе чорхое щибго къварилъи букIунаро ва какилъ хIузур цIунизеги бигьалъула. ХIузургун бараб какил цо гьитIинаб бутIа лъикIаб буго хIузур гьечIого бараб сахаб какалдасацин».
Амма рузман къоялъул какде имамас салам кьелалде щвезелъун гIедегIун ине бегьула. Гьединго гIедегIизе бегьула жив гьечIого къаммат гьабулареблъиги лъалев ва жив вачIинчIони гIадамал жамагIат-как гьечIогоги хутIулев чиясе. («ФатхIул МугIин»)
