Аварагасул ﷺ сипат
Аварагасул ﷺ сипат
Гьинд ибну Абу Гьалатида гьикъула Аварагасул ﷺ сипат гьабеян. Гьев вукIана гIадамазул сипатал гьаризе лъалев чи. Гьес абуна Авараг ﷺ вукIанин тIадегIанавлъун. Гьесул тIадегIанлъи гIадамазда бихьулебги букIанин. Гьесул гьумер букIанин гвангъараб моцI гIадинаб.
Авараг ﷺ вукIанин гьоркьохъеб хIалалдаса дагьав ворхатав. БетIер букIанин гьоркьохъеб хIалалъул. Гьумер букIанин гвангъараб ва нодо букIанин гIатIидаб. Кьунсрул рукIанин ризал, амма гьел цоцалъ рекIарал рукIинчIин.
Гьесул мегеж букIанин ризаб ва кIаркьаби рукIанин гургинал. Аварагасул ﷺ кIал букIанин гьоркьохъеб гIатIилъиялъул. ГIусал рукIанин хъахIал ва цоцалъ цурал. Аварагасул ﷺ щекъер кунчIулаанин пилалъул ракьа кинниги ва бацIцIадаб гIарац гIадин. Керен букIанин гIатIидаб, гъуждулго гIадин. РетIелалъ бахчичIеб бакIалдаса нур, канлъи загьирлъулаанин.
КIигъуждул рукIанин гIебал ва хъатал рукIанин гIатIидал. Кверазул ва хIатIазул килщазда бугеб тIом букIанин дагьабго хъачIаб. Галаби рахъулаанин гIатIидго, гIодове виччан унаанин нухда. Авараг ﷺ вилълъанхъулаан гIедегIун, хIатта кколаан гьев магIардаса гIодове унев вугилан. (АсхIабазабаз абулаан жидеда гьесда хадур гъезе бажарулароанин). ГIадамаздехун вуссунев мехалда, тIубан черхгун вуссунаан.
Гьесул ﷺ беразул балагьи букIунаанин ракьалде балагьараб. БитIахъе бадиве Авараг ﷺ балагьулароанин. АсхIабзабазда данде унаанин ва гьезие саламги кьолаанин.
Авараг ﷺ вукIинчIила я хъахIав яги чIегIеркIкIуяв. Авараг вукIанин хъахIлъигун дагьаб багIарлъи жубарав. Имам Бажурияс абуна: «Гьаб дунялалда бищун лъикIаб кьер ккола хъахIабгун багIарлъи жубараб», - ян.
Авараг ﷺ Майсаратгун Хадижатил даран гьабизе Шамалде индал, БахIирада лъана гьев авараг вукIин, бадиб жубараб багIарлъиялъухъ балагьун. Гьеб кколила авараглъиялъул гIаламатлъун.
