Аварагасул ﷺ тIабигIат
Аварагасул ﷺ тIабигIат
ГIодове виччай, чIухIи гьечIолъи, гIадамазда хIал рекъезабулевлъун вукIин - гьеб буго чиясулъ бугеб тIадегIанаб, берцинаб тIабигIат. Гьеб буго жиндехун чияр ракIал рагьиялъе сабаблъун бугеб гIамалги. Гьединаб тIабигIаталдалъун чиядехун жува-гъуван вукIунев, Аллагьас ﷻ дунялалдаги ахираталдаги, тIадегIан гьавула.
Аллагьасул ﷻ Расулас ﷺ абунин Абу Гьурайратидасан бицун буго: «Садакъа гьабиялъ боцIи-мал кигIанго дагьлъизабуларо, цогияздаса тIаса лъугьунесеги Аллагьас ﷻ тIадегIанлъи гурони кьоларо, Аллагьасе ﷻ гIоло гIодове виччан, чIухIи гьечIолъи бихьизабулевги Гьес ﷻ макъамазде вахинавула», - ян (Тирмизи).
Аллагьас ﷻ гьединаб гIамал-хасияталъул чагIи тIадегIан гьарула, гьезул чилъиги гIадамазда гьоркьоб ва гьезул пикрабазулъ щула гьабула. ГIаксияб, ай чIухIараб гIамалалда рукIунел абуни, Аллагьас ﷻ дунялалдаги ахираталдаги гIодорегIан гьарула.
ГIодове виччарав чи кидаго жиндир гIамалалдагун рагIабазда хадув чIаравлъунги вукIуна. Цинги гьединасухъа лъугьунаро Аллагьасул ﷻ ццин бахъинабулеб ва мунагьалде кколеб гIамал. ГIодове виччай буго лъикIаб тIабигIаталъул гIаламат, берцинаб рукIа-рахъиналъе мисал, ахиралда жибги гIадамаздехунгун Аллагьасде ﷻ унго-унгояб къагIидаялда гьоркьоблъи букIиналъе хIасиллъун бугеб.
ГIияз ибну Химаридасан бицун буго, Аварагас ﷺ абунин: «Аллагьас ﷻ диде вахIю гьабуна нуж чIухIи гьечIел, гIодоре риччараллъун рукIайин, нужер цонигияв цогидасда тIад чIухIаравлъун ва зулму-хIал гьабуларевлъун вукIунедухъ», - абун (ибну Мажагь).
Аварагасул ﷺ хIакъалъулъ абуни, гьев ﷺ вукIана кутакалда сабурав, чIухIи гьечIев инсан. Гьеб хасият букIана гьесулъ ﷺ рукIаразул бищунго нур бараб тIабигIатлъунги. Гьелъие гьес ﷺ гIемерал гIумруялъул мисалалги рихьизаруна. Гьеб буго нилъеца тIоцебе гьесдаса ﷺ босизе кколеб ва жинда гIамал гьабизе рекъараб тIабигIатги.
Анас ибну Маликидасан бицун буго, Мадинаялда, бокьарай, кигIан гьитIинай лагъалдаги кIолаанин Авараг ﷺ кверги ккун жиндиего бокьаралъуве вачине. Гьелъ бихьизабулеб буго, кигIан хIеренав, чIухIи гьечIев чи Авараг ﷺ вукIаравали.
Аллагьас ﷻ насиб гьабеги щивасе гьеб тIадегIанаб тIабигIат! Амин!
