Дилималда руччабазул мажлис
Дилималда руччабазул мажлис
Казбек районалъул Дилим росулъ тIобитIана «Аллагьасе мутIигIай чIужугIадан» абураб мажлис.
Казбек районалъул руччабазул рухIияб лъай кьеялъул отделалъул цеехъан Аминат Аштаевалъ цIабицана тасаттур щиб кколебали, гьелъул аслу, хIикмат ва камилаб къагIида.
«Тасаттурин абун цохIо хIижаб къаялда абуларо. Гьелъ жанибе бачуна таслим, ай тIубан Аллагьасул амруялъе мутIигIлъи ва табаррудж гьабунгутIи, ай кинаб къагIидаялъ бугониги, чияр бихьиназда цебе берцинлъи къватIиб чIвазабунгутIи», - ян бицана гьениб.
Аварагас ﷺ иман щула гьабиялде кIвар кьуна, кIиабилеб иргаялда, какалда тIадчIей гьабуна, хадуб гурони, ай гIага-шагарго гьижрияб 5-6 соналъ, рещтIинчIо тасаттуралъул аятал. Гьеб ккола авараглъи кьун 18 сон араб мех. Иманалъул щулалъи камилаб даражаялде щун букIиналъ, ГIаишатица бицухъе, гьел аятал рещтIаралго, мажгиталде, какде ракIарун рукIарал руччабаз гьебсагIат тIалаб гьабуна бетIер-рас бахчизе жо. Хадусеб къоялъ рогьалил какда цониги бетIер бахчичIей чIужугIадан йикIун гьечIо. Батараз кIаз къан, батичIез ххамил кесек ботIрода жемун, бихьиназул чалма къан, гьебги щвечIел, хIатта гIодобе рехун букIунеб турут ботIроде рехун рачIун руго. Гьединаб букIана асхIабзабазул руччабазул Аллагьасул амруялъе мутIигIлъи.
Хадубги, Авар театралъул хIалтIухъабазул кумекалдалъун, кIазил къимат цIуниялъул кIвар баян гьабулеб «МагIарулалъул шал» абураб постановкаялдаса хадуб, Аминат Аштаевалъ рачIаразе жеги баян гьабуна тасаттур инсанасул вижиялъулъго лъураб, гьес кидаго тIалаб гьабулеб жо букIин. Ва гьелде кIвар кьунгутIиялъе, нич тIагIиналъе аслияб гIиллаги – хIарамаб квен кванай букIин. Гьелъ бахчизе ккараб жо рагьиялде рачуна. Инсанияталдаго гьелъие тIоцебесеб мисалги - нилъер эбел-эмен - Адамги ХIаваги руго. ТIадегIанав Аллагьас Жинцаго Къуръаналда абухъе, кваназе гьукъараб пихъ Алжаналда кванайдал, гьезул ретIел тIаса ана, гIаврат загьирлъана ва гьел нечана.
Гьединго ракIалде щвезабуна, ТIадегIанав Аллагьас ва Аварагас руччабазе кьураб кIудияб къимат.
«…Хазина тIалаб-агъаз гьечIого цебе рехун букIунаро, гьасухъ-досухъ кодоб толаро. Хазина буго цIакъ къимат гьабулеб жо, гьеб бахчизе, цIунизе ккола», - ян бицана гьениб.
ТIолабго мажлис баракатаб, лахIзаталъцин гъапуллъизе рекъолареб хIалалъ пайда цIикIкIараб букIана. Гьеб данделъиялъул хIасилалда, гьений гIахьаллъарай Авар театралъул хIалтIухъаналъ гьенибго кIаз бана ва тIокIалъ бахъизе гьечIин лъазабуна.
Аллагьас киназего тавпикъ кьеги битIараб нухдасан ине, иманалъул нуралдалъун гвангъараб сухъмахъ кквезе. Амин!
