Аллагьас ﷻ рехсеялде рачунеб
Аллагьас ﷻ рехсеялде рачунеб
Дунялалде нилъ Аллагьас ﷻ риччан руго Гьев рехсезе, Гьесие гIибадат гьабизелъун. Гьедин ТIадегIанас абун буго (магIна): «Дица жиналги инсалги рижичIо Дие гIибадат гьабизе гурони», - ян (сурату «аз-Зарият» 56 аят).
Абу Гьурайратица бицун буго жинда рагIанин Аллагьасул ﷻ Расулас ﷺ абулеб: «Гьаб дунял буго жиндие нагIана кьураб жо, нагIана кьураб буго, Аллагь ﷻ рехсейгун гьелда сверухъ лъугьараб хутIизегIан, гьелда жаниб бугебщинабги…», - ян (Тирмизи). НагIана кьурабин абуралда гъорлъе уна Аллагьасдаса ﷻ рикIкIад гьарулебщинаб жо. Аллагь ﷻ ракIалде щвезабулеб ва Гьесул разилъиялде рачунеб гIамал гъорлъа бахъун ккола.
Аллагь ﷻ рехсеялъ кутакаб хIал гьабула чиясул черхалъе, напс берцинал гIамалазде куцала, рекIел рухIияб хIал лъикI гьабула, рахIматал рещтIинарула, захIматал яги хIажат гьечIел ишазде ккеяздаса цIунула. Кинаб хIалалда Гьев ﷻ рехсолев вугониги гьелъие щибго батIалъиги гьечIо, бегьула гIодорчIун, регун, эхетун рукIаго, рилълъанхъун унаго, гьабулеб хIалтIи бугониги мацIалъ рехсон ракIалда Аллагь ﷻ цIунун гьабизе.
Гьелъул хиралъиялъул хIакъалъулъ Къуръан-хIадисазда гIемер бицун буго. Къуръаналда буго (магIна): «Я, иман лъурал гIадамал! Нужеца Аллагь гIемер рехсе, радал-къаси Гьесие тасбихIалги гьаре», - ян (суратул «АхIзаб» 41-42 аят). Аллагь ﷻ рехсей буго кидаго инсанасул мацIгун ракI жинда ругьунлъун, мацIалдаса къотIизе тезе бегьулареб гIамал. ГIемер БетIергьан ﷻ рехсеялде, Гьесул разилъи щолел цоги гIамалазде инсан вачунеб нухги буго хIакъикъияб тарикъат, шаригIаталъул аслулъун ва нухлъун жиб бугеб.
Аварагас ﷺ абун буго: «Аллагьасул ﷻ руго хассал малаикзаби (Гьев ﷻ рехсон) зикруялда ругел гIадамал ратизегIан хьвадулеллъун жал рукIунел. Цо къокъаялда гьединал чагIи ратараб мехалъ гьез цогиязде ахIула: «Нужецаго ралагьулел рукIаразухъе рачIа», - ян. Цинги малаикзабаз гьел чагIи жидерго кваркьабаздалъун сверун ккола гъоркьияб зодоре щвезегIан. Хадуб БетIергьанас ﷻ малаикзабазда абула: «Дица нуж нугIзаллъун кколел руго гьел чагIазул мунагьал чуриялъе», - ян. Хадуб цо малаикас абула: «Гьезда гьоркьов вуго, гьездасанги кколарев, жиндир ишаз унев вукIаго гьезда аскIов чIарав (мунагьал гьарулев) цояв», - ин. Гьелъие Аллагьас ﷻ жаваб гьабула: «Гьел руго жидедехун гIодобчIей гьабурав талихIкъаравлъун лъугьунарел чагIи», - йин (Бухари, Муслим, Тирмизи).
Дунялалда балеб заман буго цIакъ дагьаб жо, кигIан боцIи-мал нилъер бугониги гьеб кинабгоги тун уна нилъ ахираталде. Амма цадахъ босулеб ва ахираталда пайдаялъе батулеб гIамал буго чIаго рукIаго гьабураб БетIергьанасул ﷻ разиялъиялде рачунеблъун жиб бугеб пиша. Гьеб гIамал кигIанаб къадаралда жинца гьабулеб бугищали пикру гьабизе ккола щивав чияс зама-заманалдасан.
Аллагь ﷻ рехсеялъ лагъ гIагар гьавула БетIергьанасде, Гьесул разилъи щвеялде. «Нужеца Дун рехсе, Дица нужги рехсела», - ян Къуръаналда абураб кинниги Гьес рехсолеллъунги рукIуна. Аварагасги ﷺ абун буго: «Аллагь ракIалде щвезавун Гьев рехсолеллъун щал чагIи ругониги, гьел малаикзабаз сверун ккола, БетIергьанасул рахIматалъулъги тIерхьуна, ракIазулъе парахалъиги лъугьуна, Жинда аскIор ругезе Аллагьас ﷻ гьезул биценги гьабула», - ян (Муслим).
Гьединал хIадисаз баян гьабула зикру бачин, Аллагь ﷻ рехсей, жалго жидедаго чIун гуреб, къокъаби гьарунги бегьулеблъи.
ГIабдуллагь ибну ГIумарица бицун буго, жинца цIеханин Аллагьасул ﷻ Расуласда ﷺ щиб жазаъ бугебин БетIергьанасул ﷻ цадахъ данделъун Гьев рехсеялъухъин абун. Аварагас ﷺ жаваб кьуна: «Цадахъ данделъун зикру бачиналъухъ жазаъ Алжан буго», - ян.
БетIергьанас ﷻ нилъ гьареги щибаб хIалалъулъ Гьев ﷻ рекIелъ цIунун, зикру бачун мацI бакъваларездаса! Амин!
