Ният бацIцIадаб бугони…
Ният бацIцIадаб бугони…
Росулъ «Ас-салам» газеталъул вакиллъун хIалтIулеб мехалда щивасул рокъове унаан газета хъвазе бугищин цIехезе. Бицунаан гьелъул пайдабазул хIакъалъулъ.
Гьединабго куцалда вагIза гьабулаан вацапаздасанги социалиял гьиназдасанги. Цо диналъул вацас хъван бачIана жиндие бокьун бугин ункъо газеталъе подписка гьабизейилан. Гьабуна гьесие ункъо подписка, ай Дагъистан тун къватIибе.
Гьелдаса нахъе гIемераб заманго иналде, районалда лъазабуна «Ас-салам» хъварал чагIазда гьоркьоб къец. Дица ахIана дов чиясухъе дуца гьабураб ункъо газеталъе подписка бугин, къецалда гIахьаллъизе рукIине лъил цIарал хъвалелилан абун. Гьес абуна дирги, инсулги, вацасулги хъвайилан. Жеги эбелги йиго досул. Дица эбелалъулгиян абидал, бегьулеб батани хъвайилан гьесги гьарана.
ЧIужугIадан бегьиларин ккун букIун буго гьесда. Къецалъул хIасилал гьарулеб къоялъ ункъо подписка гьабурав гьев чиясул эбелалъе бергьана гIумраялде ине путевка. Гьединаб гIажаибаб лъугьа-бахъин ккун букIана газеталъул баракаталдалъун.
Лъиданиги бицунгеян гьарунги букIана гьев чияс, Аллагьасе гIоло гьабураб букIанин жинца подписка. Гьединлъидал дицаги цIар рехсечIого толеб буго. Жиндие гIоло гьабураб иш Аллагьас гIадада толаро. Ният бацIцIад гьабизе нилъее тавпикъ кьеги.
