ТIалаб гьабуни щола
Хасавюрт шагьаралда, Лачен-дибирасул цlаралда бугеб ясазул мадраса хlалтlулелдаса буго чанго сон. Дагьаб цебе гьениб Къуръан цlалун лъугlизабуна 40-ялъ, ай гIисинал ясазги, гIолилазги, ригь арал руччабазги.
Сулейманова Сакинатил нухмалъиялда гъоркь хIалтIулеб мадраса хIебтIун буго гьелъул васасул рокъоб. Дарсал кьола Кураева Зугьра-Хадижатица.
3 ноябралда «Европа» абураб залалда букlана гьанже Къуръан цlалун лъугIаразул баракатаб мажлис.
Гьениб диналъул яцаз ахlана мавлидал, цlалана Къураналъул аятал, рихьизаруна батIи-батIиял сценкаби. Гьоболлъухъ рачlун рукlана Хасавюрталда бугеб лъай кьеялъул отделалъул ва «Гьидаят» централъул хlалтlухъаби. Къуръан цlалиялъул бугеб хиралъиялъул бицана Абукова Зайнабица ва Хангереева Зулейхаца.
Гьений кIалъарай Гъойтимирова Патlиматица абуна: «Сайгъатазеги баркалабазеги гIоло хlалтlулел чагlи гуро Сакинатги Хадижатги. Гьел руго унго-унгоги ракl унтун диналъе гlоло хIалтIулел руччаби», - ян.
Хадижат-мугlалималъ гьенире рачIараздехун гьабула ракl-ракlалъул бербалагьи. Гьитlинал ясал рукlа, кlудиял руччаби рукlа, ай щиялъе дандекколеб насихIатги гьабун, ракlбатизабун, мадрасалде ячlарай цониги гIадан Къуръан цlализе лъачlого гьениса нахъе йиччаларо.
Къуръаналдаго цадахъ малъула Мухlаммад аварагасул ﷺ гlумруялъул дарсал ва диналъул аслаби.
Бигьаяб иш гуро гьениб щибаб къойил дарсал кьей, амма Хадижат -мугlалималъ цlакъ мухIканго нухда бачуна гьеб иш.
Сакинатица кlиго нухалда лъугlизабуна гьеб мадраса. Щуго нусалъги ясалъги гьелъие гlумраялде ине путевкаги сайгъат гьабуна.
Киназего гьарула Аллагь разияб гlамалги, гlелму цlализе къуватги.
