Тасавуфалъул рукнаби
Тасавуфалъул рукнаби
Гьаб дунялалъул рокъоб инсанас щибаб гьабулеб иш ва хIалтIи жиндир магIнаги гIиллаги, гьелъул маслихIатги бичIчIун, лъан гьабураб лъикIаб буго. Хасго гьеб беццараб букIуна шаригIаталъул къанунал ва тIадкъаял тIуразарулел ругони.
Иманалъулгун исламалъул рукнабиго гIадин, тасавуфалъулги руго рукнаби, жал камиялдалъун инсанасул гьабулеб иш щвалде щвечIеб ва мухIканлъи гьечIеблъун букIунеб.
Тасавуфалъул буго 6 рукну. ТIоцебесеб лъабго рукну ккола жиб гIемер гьабизе тIадаб: зикру, пикру ва устарасухъе ин. Хадуб - жал дагь гьаризе кколел: калам, квен ва макьу.
ТIоцебе цIикIкIинабизе лъикIаблъун бихьизабун буго зикру, ай Аллагь ﷻ рехсей. Инсанасул гIумру тIадбуссунаро. Заман цIикIкIун арабгIан гьабулеб гIибадат-гIамалги цIикIкIинабизе рекъола. Гьединлъидал Аллагь ﷻ рехсеялде хассаб кIвар кьезе рекъараб буго.
Пикру гьабиялъулги хассаб кIвар буго инсанасул гIумруялда жаниб. ТIадегIанав Аллагьас ﷻ жив сундуе гIоло гьаб ракьалда вижун вугев ва кинабго сверухълъигун дуниял гIуцIун бугеб куцалъул пикру гьабидал, жеги лъикI бичIчIула Гьесул ﷻ ТIадегIанлъиги ХIалкIвейги.
Устарасухъе гIемер ин абураб жоялъул магIна кколаро, ракIалде ккараб мехалъ гьесухъе хьвади. Гьелъул магIна ккола, гьес малъухъе хьвади. Гьедин гьабиялда жаниб маслихIатги талихIги буго, ва гьелъул гIаксалда гьабуни, адаб теялдасан ккола. Кинго зияраталъе ин гьукъун гьечIелъул, рекъон гьабуни лъикIабги беццарабги букIина.
Дагь гьаризе кколел рукнабазул тIоцебесеб ккола кIалзул калам дагь гьаби. КIалалъ бицунелда хадуб халкквезе ккола, пайдаяб бицина яги вуцIцIун чIела.
Квен дагь гьаби ккола инсанасул черх сахлъиялда цIунулеб жо. Дагьабго ракъи лъаялъ гӀибадат гьабулеб мехалъ цӀикӀкӀун ракӀ буссинабизе кумек гьабула ва гьелъул гIаксалда, цӀикӀкӀун кванаялъ гIибадаталъе кIвахI бижизабула. Бокьа-бокьараб кванан ругони, тIаде рачIунел унтаби цIикIкIуна.
ЦIакъго кIвар бугездасан ккола макьу дагь гьаби ва хассго ригьда кьижи, радал рахъун лъикIаб гIамал гьабизе ниятгун реги. ГIемер кьижиялъ инсанасул сахлъиялъе кIудияб зарал гьабула. ТIадчIей гьабила кьижизе лъикIал гьечIел гIужазда кьижичIого чIеялда ва къайлулат гIадал, кьижизе лъикIаблъун бихьизабураб гIужалъ кьижиялда.
Бицаралъул пикруги гьабун хIалтIани, жив-живасе мунпагIатги пайдаги цIикIкIараблъун букIина.
