Ччутица ритIухъ гьавуна
Ччутица ритIухъ гьавуна
Аварагасул ﷺ мугIжизатал гIемер руго. Гьезул бищун кIудияб Къуръан бугеблъи нилъеда лъала. ГIалимзабаз абула гьезул къадар гIага-шагарго лъабазарго бугилан.
ГIумар ибну ХатIабица бицана, Авараг ﷺ асхIабзабигун вугеб мехалъ, гIалхул гIарабияв вачIанин кодоб ччутги ккун. Сверухъ асхIабзаби рихьидал, гьезда гьикъула лъида сверухъ нуж ракIарун ругелилан? Аварагасда ﷺ сверухъ ракIарун ругин жаваб щведал, гьелги тункун, Аварагасда ﷺ цевеги вачIун абула: «Я МухIаммад, руччабазул мацIалда гьечIо дур мацIалда гIадин гIемераб гьереси. Дун хехлъанин абун диде гIайибчIвазе букIинчIебани, гIемерав чиги вохизавун, чIвалаан дица мун», - ян. ГIумарица абула, я Аллагьасул расул ﷺ, кьейин ихтияр гьев чIвазе. Амма Аварагас ﷺ абула: «Дуда лъаларищ хIелмуялъ инсан авараглъиялде гIагар гьавулевлъи?» - ян.
Амма гIалхул гIарабияв гIодове виччачIо ва, Аварагасда ﷺ цебе ччутги лъун, абула: «Хъанчазул цIараздалъун гьедула, дуда божуларо гьаб ччут кIалъан дуе нугIлъи гьабизегIан», - ян. ГIалхул гIарабиясе абизе бокьун букIана ччуталъ нугIлъи гьабуларебго гIадин дицаги гьабизе гьечIин. Ччут кIалъалареблъи нилъеда лъала, амма Аллагьасе ﷻ бокьани бокьараб жо кIалъала.
Гьеб мехалъ Аварагас ﷺ ччутида абула: «Я ччут», - ян. Гьелъ жаваб гьабула: «ГIин тIамун буго, я Аллагьасул расул ﷺ», - ян. Аварагас ﷺ гьикъула: «Дуца лъие гIибадат гьабулеб?» - ян. Гьелъ жаваб гьабула: «Дица гIибадат гьабула зодоб ГIарш, ракьалда тIадегIанлъи, рахIму Алжаналъул агьлуялъе ва гIазабги жужахIалъул агьлуялъе бугесе», - ян. Хадубги Аварагас ﷺ цIехола жив щивилан? Гьелъ абула: «Мун Аллагьасул расул ва аварагзабазул хатам вуго. ТалихI буго дуда божарасе ва талихIкъей буго божичIесе», - ян. Гьеб мехалъ гIалхул гIарабияс шагьадат битIула, Аллагьги Аварагги ритIухъ гьарула. Дун духъе вачIине вукIана ва дудаса вокьуларев чи гьаб дунялалда дие вукIинчIо. Гьанже абуни дудаса вокьуларев чи гьечIо дие гьаб дунялалда».
Гьаб лъугьа-бахъиналъ баян гьабула Аллагьас ﷻ кин чи тIовитIулевали. ТIубанго купруялда, жагьиллъиялда вукIарав чи хисула, ай Аллагьасда ва Аварагасда иман лъола.
Гьенибго загьирлъана Аварагасул ﷺ мугIжизатги. МугIжизат Аллагьас ﷻ аварагзабазе кьола гьезул авараглъи ритIухъ гьабизе. ГIадатиял жал гьеб мугIжизаталъ хвезарула, масала, ччутилгун ккараб къисаялда. Ччут хIакъикъаталда кIалъаларо, амма Аллагьас ﷻ гьеб кIалъазабуна.
