Нужеца Аллагь гIемер рехсе
Нужеца Аллагь гIемер рехсе
ХIурматиял казият цIалулел, дунялалде гIадамал ритIиялдаса бугеб аслияб мурад буго гьез БетIергьанасе гIибадат гьаби. ТIагIатазул бищунго хирияздасан ккола зикру бачин, Аллагь рехсей. Хирияб Къуръаналда буго: «Ва, гьал иман лъурал гIадамал, нужеца Аллагь гIемер рехсе», - ян.
Гьелъул хиралъиялъул хIакъалъулъ имам Бухарияс бицараб хIадисалда, жинда свалат-салам лъеяв Бичасул аварагас абун буго: «Дица нужее бицинищ нужер гIамалазул бищунго лъикIаб, нужер БетIергьанасда цебеги бищунго бацIцIадаб, нужер даражаби рорхиялъулъги бищунго тIадегIанаб, месед-гIарац садакъаде кьеялдасаги хирияб, тушмангунги дандчIван, гьесул горбода нужеца яги нужер горбода гьес жо кьабиялдасаги хирияб гIамал щибали? Гьеб буго Аллагь рехсей», - ян.
Жакъа телефоназде жанире лъугьиналъ нилъеда тIубанго кIочонеб буго Аллагь рехсезе. Зикру гьабиялъе бищунго лъикIаб къагIидаги буго хIакъикъияв устарасул тарбияталде гъоркьеги лъугьун, зикру бачунеб къагIида лъазаби. Гьедин гьабураб зикру нургун бугеб букIунин хъвалеб буго тасаввуфалъул тIахьазда.
Гьанир нилъеца рехсела зикру бачиналъул ругел пайдаби:
– ШайтIан тIуризабе, къинаби ва гьелъул мугъ бекизаби.
– ТIадегIанав Аллагь рази гьави.
– РекIелъа ургъел нахъе инаби.
– РекIее гIатIилъи бачIинаби.
– Гьурмадагун рекIеда нур базаби.
– Ризкъи тIаде цIай.
– Черхгун ракI щула гьаби.
– Зикру бачунесе гьайбат, берцинлъи ва гьесдехун гьуинлъи бачIинаби.
– Исламалъул рухIлъун бугеб рокьи гьесулъе бачIинаби.
– Макъамул ихIсанлъун бугеб Аллагьасдехун муракъабат бачIинаби.
– ТIубанго Аллагьасдехун вуссин щвезаби.
– Аллагьасде гIагарлъи щвезаби.
– Аллагь лъаялъул нуцIбузул кIудияб рагьу рагьи.
– Аллагьас гьев рехсей бачIинаби. Къуръаналда буго: «Нужеца Дун рехсе, Дица нужги рехсела», - ян.
– Аллагьасул гьайбат лъазаби.
– РекIел нич бачIинаби.
– Мунагьазул кьавуялдаса ракI бацIцIад гьаби.
– Мунагьал чури. ХIасанатазул бищунго кIудияб гьеб бугелъул, гьелъ мунагьалги чурулелъул.
– Аллагьасдаги лагъасдаги гьоркьоб бугеб пардав инаби.
ГIабдуллагь МухIаммадов
