Аварагасул ﷺ хIавз

Аварагасул ﷺ хIавз

ХIавзалъул хIакъалъулъ бицун буго 30-гIан асхIабас рицарал хIадисазда. Гьезда абула «ХIадису-л-Мутаватир» (цIакъго кьучIалилан) абун. Гьеб хIавзалъубе лъим бачIуна Алжаналъусан - калкавсар.

Гьеб лъим букIуна рахьалдаса хъахIаб, гьоцIоялдаса гьуинаб, жинда Алжаналъул гьуинаб махIги бугеб. ХIавзалъул халалъиги гIеблъиги бащадаб букIуна ва гьелъул, Аварагас ﷺ абухъе, цояб рахъалдаса цоги рахъалде щвезе лъелго унев чиясе кIиго моцI къваригIуна.

Лъим гьекъезе цIарагI гьениб рикIкIун хIалкIоларебгIан гIемер букIуна. Щивасе бокьула гьениса лъим гьекъезе, амма малаикзабаз гьенире бусурбаби гурони риччаларо. Бусурбаби ратIарахъизе гьезда хассаб гIаламатги букIуна. Малаикзабаз цо-цо бусурбабиги риччаларо. Гьеб мехалъ Аварагас ﷺ абула: «Гьел дир умматалъул руго», - ян. Малаикзабаз жаваб кьела: «Гьел дуда нахърилълъинчIо», - ян. Гьеб мехалъ гьел Аварагасги ﷺ рачахъила.

Гьеб хIавзалъуса лъим гьекъанщинал Алжаналде ритIула. Аварагас ﷺ абула: «Нуж хIавзалде тIоцере дица ахIила», - ян. ТIоцебе гьес гьеб хIавзалъуса лъимги гьекъела.

Цогидал, жидеда салам лъеял аварагзабазулги жидерго хIавзал рукIина. Гьел рукIина дагьал гьитIинал.

Хадуб жужахIалда тIасан сиратIалъул кьо лъела. Гьелъул рагIалда къосарал ва мунагьал гIемерал жидеда ралел цIадул гъунцIби рукIина. Гьеб кьотIасан ине тIалъула киназдаго, хIатта салам лъеял аварагзабаздацин.

Къуръаналда буго: «Щивав ина гьеб кьодасан ва жужахIалъул лагьи лъала жинди-жиндир гIамал лъикIлъиялда рекъон», - абун. ГIамал лъикIасда дагь, квешасда цIикIкIун. Гьеб кьотIа нилъеда нилъерго лъикIал гIамалал гвангъун рихьизе руго, мунагьал гIемеразда ва къосаразда бецIлъи гурони бихьизе гьечIо.

 Гьеб кьо бахарал Алжаналде ина, хутIарал жужахIалде ккела.

Гьеб кьо цо-цоязе шагьрагIадин гIатIилъила, цогиязе хвалчадул балгIадин тIеренлъила, хIакъикъаталда гьеб кьодул сипат цебе чIезабизе Аллагьасда гурони кIоларо.

КьотIа мунапикъзабаз Аллагьасда божаразда абила, нижедехун русса, нижееги канлъи букIинеян. Гьез жаваб кьела: «Дунялалде тIадги руссун нужеего канлъи тIалаб гьабе», - ян.

Мунапикъзабаз абила: «Ниж нужгун гурищ рукIарал», - ан. Гьезие жаваб кьела: «У, амма нужецаго хвезабуна нужерго иш, нуж Аллагьасда ﷻ божичIо ва нужер хьул халалъана Аллагьас ﷻ нуж цIунилилан». Мунапикъзабиги жужахIалде ккела.

ЛъикIалги квешалги гIамалал ращад ккаралин абуни рукIина бакьулъ. Гьезда Алжанги жужахIги бихьила, рихьила Алжаналъул лазаталги, жужахIалъул гIазабалги. Аллагьасе ﷻ бокьани, гьел заманалдасан Алжаналде ритIила, жужахIалъул гIазаб гьезда бихьиларо.

ХIайваназул хIисаб-суал гьабуларо гьеб къоялъ, Аллагьас ﷻ гьезие гIакълу кьун гьечIелъул. Амма гьез цоцазе зарал гьабун бугони, рецIел босичIого теларо. Хадуб гьел киналго ракьалде сверизарила, цо-цоялни хутIун.