ГIолареб жо щиб?
ХIурматиял бусурбаби, гьале 35 соналдасаги цIикIкIун заман ана Совет союзги биххун, диналъул ахIкамал загьирго тIуразаризе рес щваралдаса. Гьеб заманалда гьоркьоб дунялалъул гIемерал хиса-басиял ккана. ХIатта гьеб заман байбихьигун гьавурав чиясул гьабсагIат 35-37 сон буго. Гьеб заманалда чIаго рукIарал гIемераз гьаб панаяб дунялги тана. Союзалъул заман какулеб мех гуро, мекъи бичIчIуге, гьеб заманалда дин гьукъиялъ букIараб захIмалъи бицинчIогоги гIезехъин гьечIо.
ХIисаб гьабеха, паризаяб как базе хIинкъараб, кIал кквезе бегьулареб, бусурбанлъиялъул кинабгIаги гIаламат загьир гьабиялъ тамихIалде цIалеб мех кинаб букIунебали. Садакъа кьезе гьукъараб, мавлид гьаби балъго гьабизе кколеб, дурго лъималазда как баян амру гьабиялъухъ жанив тIамизе рес бугеб заманалда кинаб цIар лъелеб?
Къуръан гIадамазда рагIун цIализе, лъималазда гьеб малъизе яги цогидасухъе гьел ритIизе бегьулареб мех щиб букIунеб?
АлхIамдулиллагь, реццгун щукру БетIергьанасе халкъалда букIараб гьеб зулмуги тIаса ун диналъе гIатIилъи нилъее кьурав. Гьеб нигIмат бихьичIого, гьелъухъ гIащикълъун дунял тана нилъер умумуз.
Гьанжесеб гIелалъе, ай гьеб цебе букIарабщинаб жо бихьичIеб яги дагьабго бихьараб гIелалъе бокьун буго чанго суал кьезе?
Дуе гIолареб жо щиб?
– Мажгиталги рагьун, эркенго гьенир какал разе бугеб ресищ?
– Рузманкъоялъ кинабго ишги тун, мажгиталда жанив чIун, гIибадат гьабун, кири босизе бугеб санагIатищ?
– Бокьараб мажгиталда жаниб Къуръан цIализе лъазабизе, лъимал гьенире ритIизе бугеб ресищ?
– Гъваридго исламияб гIелму цIализе бокьараб мадрасалде мунго ун яги лъимал ритIун гIарабият лъазабизе бугеб санагIатищ?
– Нух-нухазда рарал киналго санагIатал жанир чIезарурал мажгиталищ?
– Сордо-къоялъ чIечIого исламалъе хIалтIизе, дагIват гьабун гIумру инабизе бугеб ресищ?
– Дурго рокъоб бокьараб мехалда гIуцIизе рес бугеб мавлид яги мажлисищ?
– Устарасухъе ун тIарикъа-талъул вирд босун берцинго гьеб тIубазабулев вукIине бугеб санагIатищ?
– Хатму-салаваталде хьвадизе бугеб нигIматищ?
– ГIелмиял мажлисазде ун вагIзабазухъ гIенеккун пайда босийищ?
– ГIелмиял тIахьал, гIажамгун, гIурус ва магIарул мацIазда цIализе бугеб ресищ?
– Рокъобе босун бачIунеб, гIелмуялъул хазина, «Ас-салам» казиятищ?
Гьанир рехсаралщинал санагIатал руго союзалъул заманалда макьилъгицин бихьулеб букIинчIеб, ракIалде ккезецин хIинкъараб ишлъун. Балагье, заман хисараб куц. Гьединги букIаго гьанже раккарал цо-цо «гIакъилзабазул» пикруялде балагьани, цо щиб бугониги гIолеб гьечIо. Щиб жо гIоларого бугебин цIехедал, бицинеги лъалеб гьечIо. ГIажаибго гьезие данде кколел ратуларо росдал имамги, хIукуматалъ тарал хIакимзабиги, хIинкъи гьечIолъи цIуниялъул хIалтIухъабиги ва цониги жамгIияв хIаракатчиги. Гьеб бакIалдаса бичIчIулеб жо тIокIаб батIияб хутIуларо халкъалъул рахIат хвезаби, рикьи ккезаби, гIадамазул пикрабазда жаниб щаклъи бачIинаби гурони. Гьединаб пикругун ният бугезул рахъккун кIалъайги гьезие хIалай рахъун рикьи гьабиялда релълъуна.
Гьаб заманалда нилъее къваригIараб жо буго гьал цере рехсаралги, рицун рахъинчIелги нигIматаздаса пайдаги босун, нилъерго гIумру берцинго тIами. Кинаб рахъ босаниги гьаб жакъа къоялъгIан рахIатаб, эркенлъи кьураб мех цебе букIун батиларин абизе бегьила. Шукру гьабичIеб нигIмат тIаса ине рес бугелъул, рачIа нилъеца хIалкIвараб куцалъ пайда босилин Аллагьас насиб гьабураб нигIматалдаса.
