Электронияб хъалиян
Электронияб хъалиян
Хъалиян бухIиялъул заралги, диналъ гьеб бухIугеян абулеблъиги киназдаго лъала. Амма жакъа цIакъ машгьураблъун лъугьун буго электронияб хъалиян хIалтIизаби.
ГIемерав чияс гьикъулеб жоги буго электронияб хъалиян бегьулищин, исламалъ гьелда щиб абулебин абун.
Хъалиян бухIиялдалъун инсанасул ургьибе никотин ва цогидал заралиял загьраби ккола. Танхьил хъалияналдаги электронияб хъалияналдаги гьоркьоб батIалъи щибин гьикъани, гьебги добго загьру буго, амма дагьаб сихIирго, гьуинаб махI гьабун, гIадамал махсароде кквезе ургъараб.
Электронияб хъалиян къва-тIибе биччалел ва гьеб бичулел чагIазул мурад букIуна тамахьо бухIулел гIадамал ва гьанжего гьанже хъалияналде ругьунлъулел гIолохъаби, тамахьоги тун, жидер макърал электронияб хъалиян цIцIункIизе тIами, ай жидеего хайир щвезелъун.
Электрониябищ яги танхьилабищин абуни, цоялдаса-цояб квешаб буго гьеб тIолабго черхалъего.
Электронияб алаталда жаниб тамахьо букIунаро, амма гьелда жаниб хассаб лъамалъи букIуна ва гьеб токалъ хинлъизабун къватIибе бачIараб хIухьел цIцIункIула чияс ургьибе ва хадуб къватIибе пула.
ГIалимзабаз ва тохтурзабаз мухIканго чIезабун буго электронияб хъалиян зарал цIикIкIараб, рак ва цогидал унтаби лъугьиналъе сабаблъун букIин.
Танхьил хъалиян бухIизе бегьунгутIиялъе ругелщинал далилал электронияб хъалиян цIазе бегьунгутIиялъеги руго.
Гьелда жаниб исрапги, боцIи-мал хIарамаб дараналъе хIалтIизабизе бегьунгутIиги буго. Гьединго, электронияб хъалиян гьабизе, бичизе, баччизе, кинаб букIаниги гIахьаллъи гьелъулъ гьабизе бегьуларо.
Гьеб киналъего Къураналъул аятал, хIадисал ва цогидал далилал гьанир рехсезе хIажат гьечIин ккола, гIакълу бугесда бичIчIила.
