Сабруялъ даража борхула

Хирияв Аллагьас Къуръаналда абулеб буго: «Я Авараг, дуца гIадамазда абе, гьезда ракIалдейищ кколебин жидеца иман лъунин абураб рагIиялда гIейги гьабун, батIибатIиял балагьаздалъун жидер иманалъул хIалбихьи гьабичIого телин абун», - ян. (Сура Аль-ГIанкабут, 2).

Нилъеда лъазе ккола нилъер мунагьал чуризе рукIине Аллагьас нилъеде тIаде батIи-батIиял къварилъаби риччазе рукIин. Щай абуни, нилъ руго хирав БетIергьан Аллагьасе бищун рокьулел лагъзал, ай МухIаммад аварагасул уммат.

Мунагьги нилъехъа ккола, гъалатIги ккола, амма бищунго хириял щал кколелин абуни, гьел ккола тавбуги гьабун лъикIалде руссарал. Гьеб тавбу къабул гьабун букIиналъе сабабги ккола муъминчиясде тIаде батIибатIиял захIмалъаби риччай.

Аллагьасда гьаб халкъ бижилалде цебего лъалаан лъица щиб мунагь гьабизе бугебали. Гьединлъидал нилъеда ракIалде ккезего бегьуларо гьединал хIалбихьиял гьарун гурони Аллагьасда гьел лъаларин абун.

СагIид афандияс (къ.с.) «Танбигьул гIавамалда» хъвалеб буго: «Бадруялъул гъазаваталда тIоцеве шагьидлъун вуго МагьжагI абурав асхIаб. Гьев хведал гьесул эбел-эмен ва хъизан-агьлу лъугьун буго гIодизе, чIичIидизе ва цинги рещтIун буго тIадехун рехсараб аятги, гьединазе сабру гьабизе букIине ва Аллагьасдехун гьезул рокьи цIикIкIине.

Аллагьас нилъ ахIулел руго балагьазде сабру гьабизе ва кантIизарулел руго захIмалъабаздалъун иманалъул хIалбихьизе букIиналде.

Инсан вукIуна кIиго батIияв: сабруялда чIаравги ва сундулъго зигардулевги, ай иман камилавги загIипавги. Мисалалъе, ибну ГIатIаиллагьица «РухIул баяналда» хъвалеб буго лагъасул иманалъул камиллъиги загIиплъиги баянлъулин гьев эркенлъиялде ва балагьалде ккараб мехалдайилан.

Нилъеда кIочене бегьуларо захIмалъиялда хадуб бигьалъи букIунеблъи. Аллагьас Къуръаналда абулеб буго: «ЗахIмалъиялда, къварилъиялда хадуб лъикIлъиги бигьалъиги букIуна», - ян. Гьелъин нилъее лъикIаб бугеб сундулъго сабруги гьабун рукIине.

ЗахIмалъабиги къварилъабиги аварагзабаздеги, асхIабзабаздеги, табигIуназдеги, гIуламааздеги, имамзабаздеги рещтIана ва амма гьел сабруялда чIана, Аллагьасе сундулъго реццги гьабуна. Гьедин, ай гьездаса мисал босун рукIине ккела нилъги.

ХАЛИД ПАЙЗУЛАЕВ, ДГИЯЛЪУЛ СТУДЕНТ