ТIаса-масаго тезе бегьуларо
ТIадегIанав Аллагьасе ﷻ рецц буго, дунялалъуб рокъоб кинабниги заралдасаги цIунулеб, хасго ахираталда жужахIалъул цIаялдасаги цIунулеб битIараб дин халкъалъухъе рещтIинабуралъухъ. Цинги, бищун хирияб свалатгун салам лъеги гьеб дин халкъалда малъарав Бичасул аварагасда ﷺ ва гьесул агьлу-асхIабзабазда.
Жакъа кIудияб балагьлъун буго диналдаса руссин, Къуръан-хIадис жидерго напсазе бокьухъе хIалтIизаби. Щивав бусурбанчиясда лъазе ккола гьабулеб гIамал, абулеб рагIи, хьвада-чIвади шаргIалъул цIадирабазда лъезе кколеблъи. Лъолеб бугищха? Масала, лъудбузда цIарал тIамулеб мехалда. Ва цIар тIамиялъул ишги мухIкан гьабичIого, цIидасан рекъезеги рекъола. Гьеб буго жагьиллъиялъул гIаламат. Гьединлъидалин тIадаб бугеб халкъалъе бичIчIикьеялъулаб хIалтIи гьабизе.
Диналъул амраби тIаса-масаго толел руго, махIрамиял цадахъ гьечIого, руччабаз сапарал гьариялъулъ. Гьединго, бертабалъ, базаразда, батIи-батIиял хъулухъазда ва сапаразда бихьиналги руччабиги рукIунел руго жура-гъуран.
ТIадегIанав Аллагьас ﷻ хирияб Къуръаналда абун буго (магIна): «Аллагьасул амруялда хилиплъи гьабулел, гьелда нахърилълъунарел чагIазда цIунун чIаян абе тIаде бачIине бугеб балагьалдаса яги щвезе бугеб кутакалда унтизабулеб жужахIалъул гIазабалдаса», - абун («ан-Нур» 63).
Нилъ кантIизе ккола Аллагьас ﷻ рахIматалъул нуцIа рахан гьечIеблъиялде. Лъазе ккола къосарав инсан Аллагьас ﷻ кидаго Жиндир гурхIел-рахIмуялде ахIулев вукIин ва тавбуялъул нуцIа рагьухъе букIин.
Къуръаналда буго (магIна): «Нужеца киназго Аллагьасе тавбу гьабе, муъминзаби, хьул буго нуж ахиралда рохилин абун» («ан-Нур» 31).
