ХIисаб-суал

Аллагьас абулеб буго: «Я, Адамил лъимер, хвел хIакъаб буго ва кинавго чияс гьеб чIамизеги буго», - ян.

Гьединго Аллагьас абулеб буго: «Я, Адамил лъимер, гьаб дунялги тIагIине буго ва мунги хвезе вуго», - абун. Гьелъ нилъ гьеб къо тIаде щвелалде хIадурун рукIине ккола ва щивас пикру гьабизеги ккола щибги босун дун Аллагьасда цеве вахъун чIезе вугевин абун.

Щивасухъа ккола гъалатI, амма хIисаб гьабуларо гьелъул жаваб кьезе кколеблъиялъул. Гьелъ, хвалил кьогIлъи тIаде щвелалде тавбу гьабун Аллагьасда гьаризе ккола тIаса льугьаян. Нилъее баракат щваяв Къарахъа МухIаммадтIагьирица «ШархIул мафрузалда» хъвалеб буго гьадин: «Хварав чи хабалъ лъун хадуб Аллагьас гьесул рухI нахъбуссинабула ва хадуб гьесда хабадаса нахъе унел гIадамазул хIатIазул сасги каламги рагIула», - ян.

Цинги гьесухъе рачIунила кIиго малаик ва гьикъулила дур БетIергьан щивин, дур дин щибин абун. Гьединго гьикъулила ахиралда нужехъе витIун вукIарав Аварагасул хIакъалъулъ ва кинаб гIамалалдайин мун вукIарав ракьалдайилан абун. Хал гьабе, хириял вацалги яцалги, кин нилъеца ракьалда гIумру тIамулеб бугебали ва ахираб къоялде нилъ хIадурго ругищали.

ХАЛИД ПАЙЗУЛАЕВ