ГIелму гуро хIажатаб, гIамал гьаби буго
Дунялалъул рокъоб нилъеца гьабизе рес бугел пишабазул бищун хирияб буго гIелму цIали. ГIелму цIаларал жамгIияталда гIемерлъанагIан гIумру гьабизе бигьалъула. Щайгурелъул гIелмуялъ инсан къачIала ва куцала.
Жагьилав чияс лъикIлъи гьабулебинги абун, квешлъицин гьабизе рес букIуна. Жагьлу цIикIкIараб жамгIияталда квешал гIадатал гIемер ратула.
Аварагас жагьлуялъул бецIлъиялдаса гIелмуялъул нуралде рачинегIан гIарабалги рукIана бецIал гIадатазул гудракь. Гьеб сабаблъун персаздагун румазда гIодорегIаналлъун рихьулелги рукIана гьел. ГIелму цIикIкIанагIан гIадамал лъикIлъана ва жамгIият щулалъана. Гьелъул хIасилалда гIараб ракьалда загьирлъана цIияб, къуватаб пачалихъ. Гьез гIадлу тIибитIизабуна мадугьалихъ ругел ракьазда ва гIемерал гIадамаз исламги къабул гьабуна.
Анасидасан бицараб хIадисалда буго: «ГIелму тIалаб гьабизе щивав бусурбанав чиясда тIадаб буго», - ян.
Кинабниги жоялъ гIелму цIалулев чиясе мунагь чури гьарулебги букIуна. ХIатта ралъдалъ бугеб хIутIалъцин. ХIайваналдацин лъала цIаларав чи Аллагьасукьа хIинкъулевлъи ва гьединав чиясул заралалдаса жибго божараб букIунеблъи. Гьеле гьединаб къиматаб, тIадегIанаб иш буго гIелму цIали.
Гьединлъидал мадрасабазда цIалулел мутагIилзабазе цо-цо насихIаталги гьарилин. ТIоцебесеб иргаялда, Аллагьасе рецц гьабе гьедигIан тIадегIанаб ишалде нуж тIоритIаралъухъ. ГIелмуялъул нуцIа нужеда цебе рагьаралъухъ. Аллагьас нуж гьелдалъун тIаса рищун руго. Щукру гьабунагIан тIаде цIикIкIинабилинги абун бугелъул БетIергьанас.
КIиабилеб иргаялда, мадрасалда ругебгIан мехалъ, мадрасалдаса къватIиб бугеб жо хисизабизе лъугьунге! Мадрасалда ругеб мехалъ бищунго лъикI нужехъа бажарулеб иш буго нужерго цIали гьаби. Гьелда тIадчIей гьабе. ЦIали буго нахъа батулеб жо.
ЦIаларабги цIаличIебги дарсица хIасил кьечIого толаро. Гьеб кIвар бугеб иш буго. Цогидал ишазде машгъуллъун цадахъ бачунеб жо букIунаро цIали. Бокьараб ишалъ хIасил кьезе ккани, гьелъие кьезе ккола тIолабго заманги, хIалги, пикруги.
Лъабабилеб иргаялда, мугIалимзабазул адаб цIуне. Гьезул къимат гьабе. Гьел руго нуж лъикIал лъугьине бокьун хIалтIулел чагIи. Гьезул берцинабги хъачIабги калам букIуна нужеца лъикIал хIасилал кьезе бокьун. Инсуе вас жиндасаго лъикIав лъугьине бокьула ва мугIалимасе жиндирго мутагIил жиндасаго лъикIав лъугьине бокьула.
Гьезие нужеца гьабизе рес бугеб жоялъул бищун лъикIаб буго – лъикI цIали. Лъараб жоялъул пайда букIунаро нилъеца гьеб хIалтIизабулеб гьечIони. ГIелмуялъ хIасил кьезе ккани, гьелда гIамал гьабизе ккола. Ахираталъул рокъоб нилъеда батизе бугеб жо буго нилъерго гIамал.
Аллагьасда церечIараб къоялъ нилъеда данде нугIлъун чIезецин рес буго лъан хадуб гIамал гьабичIого тараб гIелму. Гьединлъидал, щвараб гIелмуялда гIамал гьабизе гIедегIе! Гьедин гьабуни Аллагьас нилъеда лъаларебги лъазабулин абун бугелъул.
СУЛАЙМАН САЙГИТОВ, ГУНИ РОСДАЛ ИМАМ
