ЦIияб басма
Гьал къоязда къватIире рачIана КъахIиса ХIасан афандиясул «Хуласатул адаб» ва «Танбигьу саликин» абурал тIахьал. Халкъалда гьоркьор гьел машгьурал рукIана Шурагьиб басмаханаялда кьабурал, цо жилдалда жаниб кIиябго тIехь бугеллъун.
Гьезул аслиял, ай ХIасанафандияс жиндирго квералъ хъварал тIахьазде тIаде ккейгун данде ккун балагьидал ругоан гьезул цо-цо хиса-басиял. Чанго батIияб квералъ хъварал тIахьалги данде росун, цоцада дандеги ккун гьел мухIкан гьариялда тIад хIалтIи гьабуна Дагъистаналъул муфти, шайих АхIмад-афандиясул бербалагьиялда ва жиндирго хасаб гIахьаллъиялда гъоркь.
Хасго «Танбигьу саликиналда» жанир ккана гIезегIан мухIкан гьариял. Гьелъие кьучIалъе хIалтIизабизе кодоре щвана живго ХIасан афандияс жиндирго квералъ хъвараб мусаввад, ай черновик, тIоцебе хъварал тIанчал. Гьелда жанибго бугоан гъоб заманалда Щурагьиб басмаханаялда хIалтIулев вукIарав ГIуриса катиб ГъазимухIаммадихъе, гьелда тIад гьаризе ругел хIалтIаби ва ихтияр баян гьабун хъвараб кагъатги.
Гьанже кьабураб басма ккола кIиябго батIа-батIа гьабураб кIиго тIехь. ХIасан афандияс гьеб кIиябго тIехьалда жаниб лъун бугин абизе бегьула тIарикъаталъул баян ва гьелъул адабазул киналго тIахьазда тIаса бищараб тIор. Берцинго гьел ричIчIун цIаларав чиясе гIемераб баян ва баракат щвела тIарикъаталда жанир ругел масъалаби ричIчIиялъе.
Гьединго гьел тIахьазда кьун буго гIараб рагIабазе мухIканал магIнабиги. Гьайгьай гьелда жанир нагагь ричIчIуларел бакIал дандчIвани, чара гьечIого гIалимзабазде аскIоре ун, баян тIалаб гьабизе ккела. Дунялалъул кигIан кIудиябги ва хириябги жавгьарал гьезул багьаялде данде щибго гуреб жо бугин абуни мекъи ккеларо. Аллагьас тавпикъ кьеги нилъее киназего гьел тIахьалги цIалун, гьезда бугелда гIамалги гьабун хьвадизе!
Амин!
