Халкъазда гьоркьосеб конференция

21-22 ноябралда Дагъистаналъул тахшагьар МахӀач-хъалаялда тӀобитӀана «Исламияб диналъул аслияб къимат хӀисабалда ВатӀаналъе хъулухъ гьаби» абураб халкъазда гьоркьосеб гӀелмиябгун практикияб конференция.

Гьелда гIахьаллъана Россиялдаса ва къватӀисел улкабаздаса диниял хӀаракатчагӀи, гӀалимзаби, экспертал, жамгӀиялгун хӀукуматалъул идарабазул вакилзаби.

Мажлисалда кӀалъана ДРялъул муфти, шайих АхӀмад-афанди, Гъиргъизия республикаялъул муфтиясул тIоцевесев заместитель Талант-ажи Темирбаев, Татарстаналъул муфти Камил-хIазрат Самигуллин, Беларуссиялъул муфти Абу-Бекир Шабанович, Бакъбаккулаб Грузиялъул муфти Этибар Эминов, Шималияб Осетия-Алания республикаялъул муфти ХIажимурад Гацалов, Россиялъул Азиялъул бутӀаялъул бусурбабазул рухӀияб идараялъул председатель Рафигулла Аширов, Москваялъул ва тӀолабго Россиялъул патриархалда цебе бугеб экспертазул советалъул председатель иеромонах Григорий (Матрусов), Египеталъул диниял ишазул рахъалъ министр, шайих МухIаммад ГӀабдурахӀим ал-Байумий, Султанат Оманалъул диниял ишазул рахъалъ министрасул гIакълучи, шайих ИсмагӀил бин Насир ал-Офи, БахIреналъул шаргIияв къади, шайих Рашид Ибрагьим ал-Мурайгьи, Нигериялъулгун Россиялъул дармил ва инвестициязул рахъалъ консультативияб советалъул председатель Эммануэль Джонсон, гьединго, Россиялъул регионаздаса ва Гьоркьохъеб Азиялъул улкабаздаса бусурбабазул Диниял идарабазул вакилзаби.

Пленарияб данделъиялда батӀи-батӀиял гӀуцӀабазул вакилзабаз, гьединго, халкъазда гьоркьосел идарабазул вакилзабаз бицана рухӀиябгун моралияб тарбия кьеялъул, диназда гьоркьоб цадахъ рекъон хӀалтӀиялъул, патриотизмалъул бугеб кӀваралъул хIакъалъулъ.

Тадбиралъул аслияб мурад букӀана рухӀиял ва моралиял къиматаздалъун гражданияб жавабчилъи ва патриотизм цебетӀезабиялъул гӀелмиял ва практикиял къагӀидаби ургъи.