КIочараллъун рукIинаро
КIочараллъун рукIинаро
Имам Маликица бицун буго Аллагьасул Расулас ﷺ абунин: «Дица нужее бицинищ БетIергьанасда ﷻ аскIоб нужер гIамалазул бищун лъикIалъул ва цIубаралъул, нуж даражаялъулъ тIадегIанги гьарулеб, месед-гIарац садакъаде кьеялдасаги хирияб, гьединго (жигьадалда) тушманасда дандги чIван, нужеца гьев чIвай яги гьес нуж (шагьидлъи щун) чIваялдасаги хирияб?» - абун.
Гьеб мехалъ аскIор рукIарал асхIабзабаз абуна: «Щиб гьеб кколеб, я Аллагьасул Расул ﷺ?» - абун. Аварагас ﷺ абуна: «ТIадегIанав Аллагь ﷻ рехсей буго», - ян.
Аллагь ﷻ рехсей, гIибадат гьаби буго нилъер гIумрудул аслияб мурад. Гьеб хIал букIине ккола муъминчиясул мацIалда, ракIалда, черхалда, ай щибаб лахIзаталда хурхараблъун. Аллагьас ﷻ хирияб Къуръаналда абун бугелъул (магIна): «Дица жиналги инсалги Дие гIибадат гьабизе гурони рижичIо», - ян (сурату «Аз-Зарият»).
Жеги абун буго (магIна): «Как бай Дун рехсезе (Дун ракIалде щвезе)», - абун (сурату «ТIагьа»). Гьаб зикри (БетIергьан ﷻ рехсей) абураб рагIи Къуръаналда 300 нухалдасаги цIикIкIун дандчIвалеб буго. Суратул «АхIзабалда» абулеб буго (магIна): «Я иман лъурал гIадамал, нужеца Аллагь ﷻ гIемер рехсей», - абун.
Аллагь ﷻ рехсолезул гIумру букIуна талихIаб, пашманлъи-къварилъи гьечIеб, тIаде бачIарабги сабруялдалъун тIобитIулеб, кIиябго рукъалъул лъикIаб жидее щвараблъун. «Нужеца Аллагь ﷻ гIемер рехсе, нуж талихIаллъун рукIина», - абун буго Къуръаналда (суратул «ЖумугIат», 10 аят). Аллагь ﷻ рехсей дагьал, гIумру, магIишат кинаб бугониги, гьезул хIал букIуна цо жо гIолареб, къваридаб, рахIат гьечIеб. Гьединаздехунги абулеб буго Къуръаналда (магIна): «Нуж рукIунге жидеда Аллагь ﷻ кIочарал гIадамазда релълъун, цинги гьезда Аллагьас ﷻ жалгоги кIоченарурал. Гьел руго пасикъзаби», - ян (суратул «ХIашр», 19 аят).
Аллагь ﷻ рехсонгутIи буго гIамалазул бищун квешабги киналниги мунагьазул аслуги. Гьелъ буго Къуръаналдаги гьединаздасан рукIунгеян абулеб.
Аллагь ﷻ рехсонгутIи буго талихIкъей, чIорого хутIи, гьабураб гIамалалъулгицин ахираталда кIудияб хIасил батунгутIи.
Аллагь ﷻ гIемер рехсолел чагIазе рохел гьабунги, Аллагьас ﷻ абулеб буго (магIна): «Нужеца Дун рехсе, Дица нужги рехсела», - абун (суратул «Мунафикъун»). Гьев ﷻ рехсеялдаго цадахъ кIочене бегьулареб гIамалалдасан буго нигIматалъухъ шукру гьабиги.
Гьеб кинабго букIинеги ккола мацIалъ абун гуреб, ботIролъ цIунараб, ракIалда накъищ бахъараб, гьениса бачIунеблъун. Аби буго, рекIел гIумру бугин Аллагь ﷻ рехсейилан. ХIадисалдаги буго: «Аллагь ﷻ рехсолезулги рехсоларезулги мисал чIагоязулги хваразулги буго», - абун (Абу Муса).
Аллагь ﷻ кидаго рехсолеб хIалалде нилъ рачунеблъун буго тIарикъат, бацIцIадаб тассавуфалъул нух, гьеб малъулел устарзаби. АлхIамдулиллагь, гьеб нигIмат нилъее кьунги буго.
