Зафар Азимов – намояндаи насли нави сармоягузорони тоҷик
Миёни соҳибкорони тоҷиктаборе, ки давоми даҳсолаҳои охир дар фазои иқтисодии Русия мавқеи намоён пайдо кардаанд, Зафар Азимов аз ҷумлаи чеҳраҳои шинохта ба ҳисоб меравад. Ӯ намояндаи насли нави соҳибкорон ва сармоягузорони тоҷик аст, ки фаъолияти худро бар пояи донишҳои муосири иқтисодӣ ва таҷрибаи байналмилалӣ бунёд кардааст.
Зафар Азимов соли 1982 дар шаҳри Хуҷанд ба дунё омадааст. Ӯ фарзанди яке аз шахсиятҳои маъруфи сиёсӣ ва иқтисодии Тоҷикистон Яҳё Азимов мебошад, ки солҳои гуногун вазифаҳои баландпояи давлатӣ, аз ҷумла мақоми Сарвазири Ҷумҳурии Тоҷикистонро бар уҳда дошт. Муҳити оилавӣ ва таваҷҷуҳи волидон ба таҳсил имкон дод, ки Зафар аз синни ҷавонӣ ба омӯзиши иқтисод ва идоракунӣ рӯ оварад.
Ӯ ҳанӯз дар синни шонздаҳсолагӣ барои идомаи таҳсил ба Иёлоти Муттаҳидаи Амрико рафт ва дар Донишгоҳи Небраска таҳсил намуд. Ин таҷриба ба ӯ имкон дод, ки бо усулҳои идоракунии ғарбӣ, бозорҳои сармоя ва низоми муосири соҳибкорӣ аз наздик ошно гардад.
Пас аз хатми таҳсил ва бозгашт ба Тоҷикистон, ӯ фаъолияти худро дар бахши хусусӣ оғоз намуд. Баъдан ба Москва кӯчид ва ҳамроҳи як гурӯҳ шарикони байналмилалӣ ширкати сармоягузории Zamwell Capital-ро таъсис дод. Ин ширкат ба харидорӣ ва рушди дороиҳои истеҳсолӣ ва саноатӣ дар Русия машғул гардид.
Аз ҷумлаи аввалин лоиҳаҳои муваффақи ӯ сармоягузорӣ ба соҳаи моҳидорӣ ва истеҳсолоти баҳрӣ буд. Баъдан фаъолияти ширкат ба бахшҳои саноатӣ, истеҳсолӣ ва истеъмолӣ густариш ёфт.
Номи Зафар Азимов махсусан пас аз харидорӣ ва рушди ширкати «Инфаприм» маъруф гардид. Ин корхона яке аз бузургтарин истеҳсолкунандагони ғизои кӯдакона, ивазкунандаи шири модар ва маҳсулоти махсуси тиббӣ дар Русия ба ҳисоб меравад. Маҳсулоти он на танҳо дар бозори Русия, балки дар кишварҳои Осиёи Марказӣ, Қафқоз ва як қатор давлатҳои дигар низ истифода мешавад.
Таҳти роҳбарии гурӯҳи сармоягузории ӯ ширкат мавқеи худро дар бозор мустаҳкам намуда, ба яке аз истеҳсолкунандагони пешсафи минтақа табдил ёфт. Барои кишварҳои Осиёи Марказӣ, аз ҷумла Тоҷикистон чунин корхона аҳамияти махсус дорад, зеро масъалаи таъмини кӯдакон бо ғизои босифат аз самтҳои муҳими сиёсати иҷтимоӣ ба ҳисоб меравад.
Зафар Азимов инчунин дар рушди бахши саноати сохтмонӣ иштирок кардааст. Соли 2023 гурӯҳи сармоягузории вобаста ба ӯ дороиҳои истеҳсолии ширкати байналмилалии Holcim-ро дар Русия харидорӣ намуд. Ин корхонаҳо имрӯз бо бренди нави «Цементум» фаъолият мекунанд ва аз ҷумлаи бузургтарин истеҳсолкунандагони семент ва масолеҳи сохтмонӣ дар Федератсияи Русия ба шумор мераванд.
Коршиносон ин харидро яке аз муҳимтарин муомилаҳои сармоягузории солҳои охир дар бахши саноати сохтмон арзёбӣ мекунанд. Бо анҷоми ин созиш Зафар Азимов худро ҳамчун яке аз бозигарони ҷиддии бозори саноатии Русия муаррифӣ намуд.
Фаъолияти ӯ танҳо ба Русия маҳдуд намешавад. Азимов дар як қатор кишварҳо лоиҳаҳои сармоягузорӣ дошта, дар бахшҳои истеҳсолот, савдо, молия ва амволи ғайриманқул низ фаъолият мекунад. Ба шарофати шабакаи васеи робитаҳои байналмилалӣ ва таҷрибаи кор дар бозорҳои гуногун, ӯ ба яке аз соҳибкорони муваффақи тоҷиктабор дар хориҷ табдил ёфтааст.
Моҳи июни соли 2021 Зафар Азимов дар корхонаи қолинбофии Қайроққум мизбони Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Ӯзбекистон муҳтарам Шавкат Мирзиёев гардид. Ин боздид аҳамияти рамзӣ дошта, нақши корхонаҳои муштараки истеҳсолиро дар таҳкими ҳамкориҳои иқтисодии минтақа нишон дод.
Имрӯз Зафар Азимов ҳамчун намояндаи насли нави соҳибкорони тоҷик шинохта мешавад. Ӯ фаъолияти худро бар пояи сармоягузорӣ, идоракунии муосир ва рушди истеҳсолот бунёд намуда, дар иқтисоди Русия ва фазои соҳибкории минтақа мавқеи назаррас касб кардааст. Робитаҳои байналмилалӣ, таҷрибаи идоракунӣ ва ҳузур дар соҳаҳои муҳими иқтисодӣ ӯро ба яке аз чеҳраҳои таъсиргузори тоҷиктабор дар хориҷ аз кишвар табдил додаанд. («Таҳия, тарҷума ва такмили Шариф Ҳамдампур»)
Идома дорад…
