Усулҳои халқии табобати эпилепсия
Авлоди шавҳари ман бемории эпилепсия доштаанд. Ду писари дугоники ман низ ба ин беморӣ гирифторанд. Чандин сол боз бо ду фарзанди бемор дар азобам. Илтимос, ягон роҳи табобати гиёҳии ин бемориро ба мани сарсон нишон диҳед!
Посухи табиби мардумӣ Садриддиншоҳ Ҷалолӣ:
- Чизе, ки ба чунин беморон мисли обу ҳаво зарур аст, ин оромии руҳист. Кӯшиш намоед, ки фарзандонатон ҳеҷ гоҳ асабӣ нашаванд. Стресс, ҳаяҷон ва тарсу ҳарос махсусан дар фаслҳои баҳор ва тирамоҳ барои гирифторони эпилепсия хавфнок аст, ҳар як ҳодисаи ногувор метавонад боиси хуруҷ намудани ин касалӣ гардад. Баҳор аз як тараф эпилепсияро авҷ бахшад, аз ҷониби дигар бо гулу гиёҳҳои сабзи шифобахшаш дармони ҷони гирифторони ин беморӣ мегардад.
Инак, чанд давои баҳорӣ барои касоне, ки эпилепсия доранд.
Нусхаи аввал
Дар зарфе 2 қошуқ пудина андохта аз ним литр оби ҷӯшидагӣ резед ва монед 2 соат истад. Дар ин муддат гиёҳоб ба доруи беҳтарин табдил меёбад. Аз ин гиёҳоб рӯзе 4 маротиба 50 граммӣ пеш аз хӯрок нӯшидан лозим аст.
Нусхаи дигар
1 қошуқ гули барфак (ландыш)-ро дар зарфе андохта аз болояш якуним истакон об резед ва дар оташи паст 15 дақиқа ҷӯшонед, сипас оташро хомӯш намуда, монед 1-2 соат истад. Ин даворо гирифторони эпилепсия бояд рӯзе 3 маротиба ним истаконӣ бинӯшанд.
Нусхаи сеюм
10 дона гули гиёҳи пижмаро дар зарфе андохта аз болояш ним истакон оби ҷӯшидагӣ резед ва монед 20 дақиқа истад. Давои ҳосилшударо рӯзе 3 маротиба 1 қошуқӣ нӯшидан кифоя аст.
