5 ғизои солим барои майнаи сар

Майнаи сари инсон яке аз фаъолтарин узвҳои бадан ба шумор меравад. Бо вуҷуди он ки ҳамагӣ тақрибан ду фоизи вазни баданро ташкил медиҳад, барои фаъолияти муътадили худ 20-30 фоизи нерӯеро, ки организм истеҳсол мекунад, истифода мебарад. Агар майна ба миқдори кофӣ моддаҳои ғизоӣ ва об нагирад, инсон зуд хаста мешавад, диққаташ парешон мегардад, қобилияти дар хотир нигоҳ доштани маълумот коҳиш меёбад ва самаранокии кор паст мешавад.

Мутахассисони соҳаи ғизо тавсия медиҳанд, ки барои фаъолияти хуби майна ва пешгирии норасоии микроэлементҳои зарурӣ панҷ намуди маҳсулотро мунтазам истеъмол намоем.

Кабудиҳо. Сабзавоти баргдор, аз қабили исфаноҷ, шибит, ҷаъфарӣ ва дигар кабудиҳо аз лютеин бой мебошанд. Ин микроэлемент на танҳо барои саломатии чашм муҳим аст, балки ба коркарди дурусти маълумот аз ҷониби майна низ мусоидат мекунад. Норасоии лютеин метавонад боиси зуд хаста шудани чашм ва коҳиши қобилияти тамаркуз гардад.

Тухм. Зардии тухм манбаи хуби витамини В4 (холин) мебошад. Ин витамин дар ташаккули ҳуҷайраҳои асаб, беҳтар шудани хотира ва тақвияти диққат нақши муҳим дорад. Илова бар ин, холин ба фаъолияти дурусти системаи асаб мусоидат намуда, дар паст кардани хавфи баъзе мушкилоти равонӣ низ саҳм мегузорад.

Бодом. Бодом дорои миқдори зиёди витамини Е мебошад. Ин витамин ҳуҷайраҳои асабро аз таъсири омилҳои зараровар муҳофизат карда, ба фаъолияти муътадили майна мусоидат мекунад. Истеъмоли муътадили бодом метавонад барои нигоҳ доштани қобилияти фикрронӣ ва хотира муфид бошад.

Моҳии равғанин. Навъҳои гуногуни озодмоҳӣ, аз ҷумла лосос аз кислотаҳои равғании Омега-3 ва Омега-6 бой мебошанд. Ин моддаҳо барои фаъолияти ҳуҷайраҳои майна зарур буда, ба барқароршавии бофтаҳои асаб мусоидат мекунанд ва метавонанд раванди пиршавии системаи асабро суст намоянд.

Оби нӯшокӣ. Қисми зиёди майнаи сар аз об иборат аст. Ҳатто каме беоб шудани организм метавонад ба фаъолияти майна таъсири манфӣ расонад. Дар чунин ҳолат инсон зуд хаста мешавад, диққаташ коҳиш меёбад ва кайфияташ бад мегардад. Аз ин рӯ, мутахассисон тавсия медиҳанд, ки дар давоми рӯз мунтазам об нӯшанд ва ташнагиро мунтазир нашаванд.

Ғизои солим ва мутавозин яке аз шартҳои асосии нигоҳ доштани фаъолияти хуби майна мебошад. Бо ворид намудани ин маҳсулот ба ғизои ҳаррӯза ва риояи тарзи ҳаёти солим метавон хотираи хуб, қобилияти тамаркуз ва фаъолияти баланди зеҳниро барои солҳои дароз ҳифз кард.