Ҳушдор ба муҳоҷирон ва посухи вазорати меҳнат…
Ҳушдор ба муҳоҷирон ва посухи вазорати меҳнат…
Ба иттилои Вазорати корҳои дохилии Тоҷикистон ва Вазорати меҳнат, муҳоҷират ва шуғли аҳолӣ, 120 ҳазор шаҳрванди Тоҷикистон ҳамчун қонунвайронкунанда дар қаламрави Русия ба қайд гирифта шудаанд.
Дар робита ба ин, ба диққати шаҳрвандони кишвар мерасонем, ки тағйирот ба қонунҳои федералӣ оид ба будубоши шаҳрвандони хориҷӣ дар Федератсияи Русия аз 5-уми феврали соли 2025 эътибори қонунӣ пайдо мекунанд.
Русия маҳдудиятҳои нав барои шаҳрванди хориҷиро ҷорӣ мекунад ва дар ин замина Вазорати корҳои дохилии Федератсияи Русия системаи махсуси ихроҷ (депортатсия) таъсис дода, зиёда аз 120 ҳазор шаҳрванди тоҷикро ҳамчун қонунвайронкунанда ба “рӯйхати шахсони назоратшаванда” шомил намудааст.
Аз ин рӯ, Вазорати корҳои дохилии Тоҷикистон ва Вазорати меҳнат, муҳоҷират ва шуғли аҳолӣ ба шаҳрвандон тавсия медиҳанд, ки барои муайян намудани вазъи ҳуқуқии худ ба сомонаҳои расмии mehnat.tj ё migration.tj ва vkd.tj истифода баранд.
Барои маълумоти бештар, Pressa.tj бо рақамҳои дар сомонаи Вазорати меҳнат гузошташуда занг зад ва бо кормандони масъул суҳбат орост. Азбаски онҳо барои мусоҳибаи рӯ ба рӯ розӣ нашуданд, мо телефонӣ ба чанд суоли худ посух гирифтем. Мо борҳо кӯшиш намудем, ки бо роҳбарияти вазорат ҳамсуҳбат шавем, маълумоти бештар ба даст орем ва сокинони кишварро огоҳ намоем, ки дар чунин ҳолат чӣ гуна рафтор намоянд. Аммо, мутаассифона, роҳбарияти вазорат аз мулоқот бо Pressa.tj худдорӣ намуд.
Ба ҳар сурат, мо кӯшиш намудем лоақал тавассути суҳбати телефонӣ бо онҳо ба саволҳое, ки хонандагон ба мо медиҳанд, посух пайдо кунем.
Ва инак чанд саволу ҷавоб:
Pressa.tj: Чаро дар рӯйхат ному насаби шахсони дорои шиносномаи Русия ва нафарони фавтида низ ҳастанд?
Масъули вазорат: Мо наметавонем ба ин савол аниқ ҷавоб диҳем, чун ин рӯйхатро ба мо аз Русия равон карданд.
Pressa.tj: Агар шаҳрванд ба таври қонунӣ дар қаламрави Русия зиндагӣ мекунад ва номи ӯ дар ин рӯйхат ҳаст, ба куҷо бояд муроҷиат кунад?
Масъули вазорат: Дар ҳар як шаҳри Русия мо намояндагии Вазорати меҳнат, муҳоҷират ва шуғли аҳолиро дорем. Барои гирифтани номи худ аз рӯйхат, онҳо метавонанд ба намояндагии мо дар шаҳри воқеъбудаашон муроҷиат намоянд. Суроғаи намояндагии мо ва шаҳрҳо дар сомонаи расмии Вазорати меҳнат гузошта шудааст.
Шахси масъул аз ҷавоб ба саволҳои дигаре, ки метавонистанд ба ин торикӣ рӯшноӣ андозанд, худдорӣ намуд. Албатта мо медонем, ки бо Вазорати корҳои дохилии Русия иртибот гирифтани Вазорати меҳнат, муҳоҷират ва шуғли аҳолӣ душвор аст, вале вазъи муҳоҷирон талаб мекунад, ки ба ин саволҳо посух дода шавад.
Мо ҳоло ҳам мунтазир ҳастем, ки масъулини вазорат омодагӣ зоҳир мекунанд, ки ба саволҳои хонандагон посух диҳанд. Ҳафтаномаи “Тоҷикистон” ва ”Pressa.tj” гӯшаи “Гуфтугӯи мустақим” доранд, ки мо метавонем онро дар ихтиёри онҳо қарор диҳем ва ба аудиторияи 5 000 000 онҳо асли масъаларо шарҳ диҳанд ва муҳоҷирони тоҷикро раҳнамоӣ кунанд.
Ҳоло мо рақами телефонҳоеро пешниҳод мекунем, ки хонандагон тавассути он метавонанд ба саволҳои худ посух пайдо намоянд.
Вазорати меҳнат, муҳоҷират ва шуғли аҳолӣ:
250-32-40; 250-32-09; 250-32-42
Хадамоти муҳоҷират:
225-05-95; 225-05-89; 225-05-77
Вазорати корҳои дохилӣ:
227-86-31; 221-98-12; 938762626; 939220684
Бояд гуфт, ки ҳар як шаҳрванд имкони як маротиба занг зада пурсиданро дорад. Барои ҳамин, кӯшиш кунед, то ба пуррагӣ ба саволҳои худ ҷавоб гиред.
