Русия назорати муҳоҷиронро сахттар мекунад
Ҳукумати Русия ба Думаи давлатӣ пешниҳод кард, ки асосҳо барои рад кардани иҷозатномаи кор ё патент барои муҳоҷирон бештар карда шаванд. Лоиҳаи қонун, ки дар сомонаи Думаи давлатӣ нашр шудааст, пешниҳод мекунад, ки мақомоти андоз ба таври худкор (автоматӣ) маълумот дар бораи даромади шаҳрвандони хориҷӣ ба Вазорати корҳои дохилии Русия ирсол кунанд.
Агар маълумот пешниҳод нашавад, мақомоти Русия метавонанд ба муҳоҷир патент надиҳанд ё иҷозатномаи кории ӯро, ки пештар гирифта буд, бекор кунанд. Ғайр аз ин, дар сурати кам будани даромад аз маоши ҳадди ақал, патенти муҳоҷир низ метавонад бекор гардад. Барои онҳое, ки бори аввал ҳуҷҷат барои патент супоридаанд, ин талабот татбиқ намешавад.
Инчунин, қонуни пешниҳодшуда тартиби гирифтани ҳаққи иқоматро тағйир медиҳад. Шаҳрвандони хориҷӣ бояд маълумот дар бораи даромадро ҳар семоҳа пешниҳод кунанд, ва дар ҳолати кам будани даромад дар давоми 10 моҳ, ҳаққи иқомат бекор мешавад.
Ҳанӯз маълум нест, ки Дума кай ин қонунро баррасӣ хоҳад кард. Аммо мансабдорони Русия бо қабули даҳҳо қонун ва тағйиру иловаҳо дар соли 2025 назоратро қариб дар тамоми соҳаҳо ва кори муҳоҷирон – аз истифодаи замимаву паёмрасонҳои мобилӣ то қоидаҳои убури марз тақвият додаанд.
