Хатсайри Душанбе-Москва дубора фаъол мешавад?
Масъалаи барқарор кардани ҳаракати қатораи мусофирбари мустақим дар масири Душанбе - Маскав миёни намояндагони вазоратҳои нақлиёти Тоҷикистон ва Русия мавриди баррасӣ қарор гирифт. Ин мавзӯъ дар мулоқоти муовини вазири нақлиёти Тоҷикистон Шоиста Саидмуродзода бо муовини вазири нақлиёти Федератсияи Русия Дмитрий Зверев матраҳ шудааст.
Тибқи иттилои расмӣ, вохӯрии ҷонибҳо рӯзҳои 1-3 апрел дар шаҳри Санкт-Петербург, дар ҳошияи нахустин Форуми байналмилалии нақлиётӣ-логистикӣ баргузор гардидааст.
Дар ҷараёни мулоқот танҳо масъалаи барқарорсозии ҳаракати қатораи мусофирбар матраҳ нашуд. Ҳамчунин, ҷонибҳо имкони харидории техникаи роҳи оҳани Русия, аз ҷумла бо шартҳои лизинг, инчунин дастрас намудани вагонҳои муосири боркашонӣ ва мусофирбарро низ баррасӣ кардаанд.
Ба иттилои манбаъ, дар баробари ин, масъалаҳои вобаста ба рушди масирҳои алтернативӣ, бартарафсозии маҳдудиятҳои зерсохторӣ ва инчунин роҳандозии хатсайрҳои мунтазами автобус байни шаҳрҳои Тоҷикистон ва Русия дар меҳвари гуфтугӯ қарор доштаанд.
Ҷонибҳо зикр кардаанд, ки тайи солҳои охир миёни Тоҷикистон ва Русия дар бахши ҳамлу нақли бору мусофирон динамикаи мусбат ба назар мерасад. Ба гуфтаи онҳо, имтиёзҳои тарифӣ барои интиқоли маҳсулоти кишоварзии Тоҷикистон тавассути роҳи оҳан ба Русия, ба ин раванд мусоидат менамояд.
Ҳамчунин таъкид шудааст, ки табодули солонаи иҷозатномаҳо барои ҳамлу нақли байналмилалии бор ба кишварҳои сеюм низ ба таври муназзам идома дорад. Дар ин замина, ҷонибҳо аз ҷалби ширкатҳои русӣ ба тарҳҳои нақлиётӣ ва логистикӣ дар ҳудуди Тоҷикистон изҳори ҳавасмандӣ кардаанд.
Дар ҳамин ҳол, тавре ба Pressa.tj аз Роҳи оҳан хабар доданд, то имрӯз асосан вагонҳое истифода мешуданд, ки дар корхонаи вагонтаъмиркунии шаҳри Тошканд аз таъмир бароварда шудаанд. Ин нукта нишон медиҳад, ки масъалаи навсозии парки вагонҳо ва дастрас кардани техникаи муосир барои беҳтар намудани сифати хизматрасонӣ яке аз масъалаҳои муҳим боқӣ мемонад.
Ёдовар мешавем, ки ҳаракати қатораи мустақими мусофирбар дар масири Маскав – Душанбе ҳанӯз соли 2012 бо сабаби кам будани шумораи мусофирон қатъ гардида буд. Бо вуҷуди ин, ҳоло ҳам имкони сафар аз Душанбе ба Маскав тавассути қатораи Душанбе-Волгоград вуҷуд дорад. Ин сафар, бо назардошти гузаришҳо, тақрибан 3 шабонарӯзу 22 соат тӯл кашида, ҳафтае як маротиба анҷом мешавад.
Баррасии дубораи масъалаи азсаргирии қатори мустақими Душанбе – Маскав метавонад барои ҳазорҳо мусофир, бахусус муҳоҷирони меҳнатӣ ва шаҳрвандоне, ки пайваста миёни ду кишвар рафтуомад мекунанд, як қадами муҳим арзёбӣ шавад.
