$760 миллион дар 4 моҳ
$760 миллион дар 4 моҳ
Дар чор моҳи аввали соли 2025 гардиши мол миёни Тоҷикистону Русия ба беш аз 760 миллион доллар расид. Ин рақам нисбат ба ҳамин давраи соли гузашта 20 фоиз зиёд аст. Ин маълумотро Соҳибҷон Зиёев, сардори шуъбаи ҳамкориҳо бо давлатҳои хориҷи наздики Вазорати рушди иқтисод ва савдои Тоҷикистон дар маросими ифтитоҳи миссияи тиҷоратии ширкатҳои Русия дар Душанбе зикр намуд.
Дар мақоми аввал
Таври маълум, Русия бо саҳми беш аз 20 дарсади ҳаҷми гардиши мол миёни шарикони тиҷоратии Тоҷикистон дар ҷойи аввал қарор дорад.
Ба андешаи таҳлилгарони масоили иқтисодӣ, афзоиши гардиши тиҷорат байни Тоҷикистону Русия бозгӯи сатҳи баланди ҳамкории иқтисодӣ ва иқтидори назарраси ду кишвар аст. Ғайр аз ин, рушди ҳамкориҳои дуҷониба на танҳо дар сатҳи гардиши мол, балки дар заминаҳои татбиқи лоиҳаҳои муштарак, бахусус дар бахшҳои кишоварзӣ, саноати хӯрокворӣ, дорусозӣ, маҳсулоти тиббӣ, технологияҳои сохтмонӣ ва инфрасохтори шаҳрӣ низ ба назар мерасад. Ин бахшҳо имкониятҳои васеи рушди иқтисодиро барои ҳар ду ҷониб фароҳам меоранд.
Тоҷикистон рақамӣ мешавад
“Маблағгузории асосӣ дар Тоҷикистон суръати баланди афзоиш дорад, сармоягузориҳои давлатӣ бахши умдаи хароҷоти буҷети давлатиро ташкил медиҳанд, яъне имконот дар бозори Тоҷикистон хеле васеъ аст”,- шарҳ дод Соҳибҷон Зиёев, сардори шуъбаи ҳамкориҳо бо давлатҳои хориҷи наздики Вазорати рушди иқтисод ва савдои Тоҷикистон.
Ҳоло Тоҷикистон дар равандҳои рақамигардонӣ ва амалӣ намудани лоиҳаҳои стратегӣ, ба мисли “Шаҳри ҳушманд” ва “Шаҳри бехатар” пешрафтҳои назаррас дорад. Ин лоиҳаҳо барои ширкатҳои русӣ имкониятҳои нав ва бозори калони озодро фароҳам меоранд, ки метавонанд тавассути таъсиси корхонаҳои муштарак ва истеҳсолот дар Тоҷикистон истифода шаванд.
Маблағгузории давлатӣ дар Тоҷикистон суръати баланди афзоиш дорад. Ин нишонаи рушди устувор ва эътимоднокии иқтисодии кишвар мебошад. Ба гуфтаи Соҳибҷон Зиёев, бо дастгирии ҳукуматҳои ҳар ду кишвар ва афзоиши ҳаҷми муомилоти мол, имкониятҳо барои густариши ҳамкории тиҷоратӣ то ба 2 миллиард доллар дар оянда зиёданд.
Инчунин, даъвати ширкатҳои русӣ барои иштирок дар Анҷумани иқтисодии байналмилалии Осиёи Марказӣ, ки 22-юми июл дар Душанбе баргузор мешавад, нишонаи ҳамкории иқтисодӣ ва таҳкими робитаҳо мебошад.
Шарики стратегӣ
Ҳамкории тиҷоратӣ ва иқтисодии Тоҷикистону Русия рӯ ба рушд дорад. Русия ҳамчун шарики стратегӣ бо саҳми бузург дар гардиши мол ва татбиқи лоиҳаҳои ҳамкорӣ нақши калидӣ дорад. Ҳамзамон, имкониятҳои васеи рушди лоиҳаҳои нав дар бахшҳои мухталифи иқтисод ва рақамигардонӣ ба ҳар ду кишвар барои тақвият бахшидани муносибатҳо ва густариши иқтисод кумак мерасонанд. Дар оянда афзоиши ҳаҷми гардиши мол ба 2 миллиард доллар метавонад рушди устувори ин равандро таъмин намояд ва барои бозори Тоҷикистон имкониятҳои навро ба вуҷуд орад.
Русия яке аз бозорҳои калони истеъмолӣ ва истеҳсолӣ дар минтақа аст. Тоҷикистон имкон дорад, ки боз ҳам бештар маҳсулотро ба ин кишвар содирот кунад. Зеро таҳлилҳо нишон медиҳанд, ки ҳамкории иқтисодӣ танҳо ба гардиши мол маҳдуд намешавад. Ҳамкорӣ дар соҳаҳои муфид ва афзалиятноки иқтисодиёти ҳарду кишвар низ густариш меёбад. Аз ҷумла, кишоварзӣ ва саноати хӯрокворӣ. Истеҳсоли муштарак ва тақвияти истеҳсоли маҳсулоти озуқаворӣ бо истифода аз таҷрибаи Русия метавонад сатҳи амнияти озуқаворӣ дар Тоҷикистонро баланд бардорад. Бинобар ин, афзоиши ҳаҷми гардиши мол ба 2 миллиард доллар ва ҷалби сармояи нав имкон дорад, ки Тоҷикистонро ба бозори муҳим дар минтақа табдил диҳад. Бо ин мавқеи Русия низ ҳамчун шарики стратегӣ боз ҳам мустаҳкам мегардад.
