Маърифати молиявӣ. 5 роҳи сарфа кардани пул
Ҳамарӯза мо барои хариди маҳсулоти рӯзгор вориди мағоза ё бозор мешавем. Оё медонед, ки харид кардан ҳам қоидаҳои худро дорад? Пас, 5 қоидаро бароятон пешниҳод менамоем. Ба назар сода менамоянд, аммо барои сарфаи пулу зиндагии беҳтари шумо кӯмак мекунанд.
Якум, харид аз бозор роҳи хуби сарфаи пул аст. Пеш аз бозор рафтан рӯйхати маҳсулоти заруриро тартиб диҳед. Ин ба шумо кӯмак мекунад, ки харидро бо тартиб анҷом диҳед. Яъне, хариди бе нақша ба харҷи нолозим оварда мерасонад.
Дуюм, нархҳоро муқоиса намоед. Дар бозор нархи маҳсулот бештар ба фурӯшанда вобаста аст ва фарқ мекунад. Аз ин рӯ, пеш аз харид, ҳадди ақал дар ду-се дӯкон ё растаҳои бозор нархҳоро пурсед, муқоиса намоед.
Сеюм, шарм надоред, савдо кунед. Зеро савдо кардан як амали муқаррарӣ дар бозор аст. Саволи оддии “Нархи охиринаш чанд аст?”, “Арзонтар намешавад?” метавонад натиҷаи хуб диҳад. Дар натиҷа, нарх паст шуда, маблағи сарфашударо метавонед барои чизҳои дигар истифода баред.
Чорум, барои пешгирӣ аз харҷи зиёдатӣ, бо худ маблағе гиред, ки ба рӯйхати харид мувофиқат кунад. Ҳангоми муқоисаи нархҳо ба сифати маҳсулот низ аҳамият диҳед. Баъзан маҳсулоти арзонтар метавонад бесифат ё муҳлаташ гузашта бошад.
Панҷум, бо фурӯшанда хушмуомила бошед. Эҳтиром дар муошират ба коҳиши нарх мусоидат менамояд.
Хуб, агар ҳар рӯз 10 сомонӣ сарфа намоед, дар 1 моҳ 300 сомонӣ мешавад!
Шумо чӣ гуна сарфа мекунед? Оё рӯйхати харид тартиб медиҳед?
