Кадом буҷаи хонавода беҳ аст?
Кадом буҷаи хонавода беҳ аст?
Суол: Кадом буҷаи хонавода беҳ аст? Умумӣ, ё ҳар аъзои оила ҷудо? Мо даромади худро ҷамъоварӣ карда, бисёр ҳолат якҷоя сарф мекунем. Баъзан пули худро низ илова мекунам. Музди меҳнати кардаро ба худам гузорам, шаҳарам низ пули кор караашро бо худ гузорад. Дар ин ҳолат чӣ тавр бояд муносибат кард, ки байни мо баҳсу мунозираву ранҷу малолшавӣ рух надиҳад?
Ҷавоб: Кадом буҷа беҳтар аст? Ҳама чиз дар муносибат миёни аъзои оила аст, ки мақом, ё саҳми мард дар ба даст овардани муҳимоти рӯзгор ва саҳми зан дар нигаҳдориву сарфакории моликияти хонавода аст. Дар ҳама ҳолат машварати миёни аъзои оила аз фоида холӣ нест, ки ин кори хеле муҳим ба шумор меравад.
Зан вазифадор нест, ки аз паи ба даст овардани маблағе гардад, ки ин масъулият ба мард, яъне таъмини хонавода, бо ғизо, манзил в ғайра дода шудааст.
Зани ба балоғат, ё аз назари зеҳнӣ бузургшуда, метавонад моликияти худро мустақилона, аз рӯйи диди хеш истифода кунад. Мард бошад, бе иҷозаи зан наметавонад моликияти ӯро истифода кунад.
Бояд дар хонавода ҳамоҳангӣ дар боварӣ, хоҳиши дастгирии якдигар ҳукумрон бошад. Бинобар ин, маслиҳати банда он аст, ки суолро яктарафа нагузошта, дар ҳолати ором бо шавҳаратон ин масъаларо ба миён гузоред, ки дар кадом ҳолат анҷоми дурусти чунин корро мехоҳед. Муҳим он аст, ки якравӣ ба миён нагузошта, балки аз таҳти дил дар манфияти марди дӯстдоратон шуда, издивоҷи хешро мустаҳкамтар карда, меҳру муҳаббатро байни худ зиёдтар созед.
