Саволҳои хонандагон

Имсол фидяи рўза барои инсонҳои бемор чанд рубл муайян шудааст?

Бародари азиз, тибқи қарори Шўрои уламо имсол фидяи рўза барои беморони дармоннопазир ва пирони солхўрда 500 рубл муайян шудааст.

Имсол фитри рўза чӣ микдор муайян шудааст? Шахсоне, ки камбизоат ё қарздоранд, ба онҳо фитри рўза воҷиб аст? Оё садақаи фитр ба монанди закот бар касе воҷиб аст, ки молаш ба нисоб расидааст?

Бародари азиз, тибқи қарори Шўрои уламо имсол меъёри садақаи фитр 250 рубл муайян шудааст. Барои ашхоси камбизоат ва қарздор садақаи фитр воҷиб нест. Садақаи фитр ба ашхосе воҷиб мешавад, ки ба миқдори 618 000 рубл маблағи нақд ё ба ҳамин арзиш сармоя дошта бошанд, ҳамчун ҷиҳози хона, қолин ва ғайра, ки мавриди истифода набошанд.

Пули нақд надорам, аммо ба андозаи 48 гр тилло ва 215 гр нуқра дорам. Аз ин миқдор чӣ қадар закот бояд супорам?

Ба ҳисоби шаръӣ нисоби тилло 85 гр ва нисоби нуқра 600 гр аст. Нисоби тилло бо арзиши миёнаи имрўз ба 618 000 рубл баробар мебошад. Аз ин лиҳоз, айни ҳол шумо молики нисоб нашудаед ва бар шумо закот воҷиб нест. Лекин ба шукронаи ин неъмат агар аз даҳ ҳазор рубл 250 рубл ба ягон ниёзманде диҳед, савоб мегиред.

Дар ороишоти тиллоии занон закот воҷиб аст ё на?

Заноне, ки ба андозаи 85 гр ороишоти тиллоӣ ё 600 гр ороишоти нуқрагин дошта бошанд, дар он закот воҷиб мегардад. Аз зеварҳои тиллоӣ 2,125 гр тилло ва аз зеварҳои нуқрагин 15 гр нуқра ё қимати онро пардохт мекунанд.