Нокомии паҳлавонони тоҷик дар Тошканд
Нокомии паҳлавонони тоҷик дар Тошканд
8 паҳлавони тоҷик дар Чемпионати ҷаҳонии ҷудо дар Тошканди Ўзбекистон ба нокомӣ дучор шуданд. Дар ин миён танҳо ба Эмомалии Нуралӣ муяссар шуд, ки бо майдондории худ мухлисон ва коршиносони ҷудоро мафтун кунад.
Эмомалии Нуралӣ дар вазни 66 кг дар даври аввал озод буд ва дар даври дуюм бо ҷудокори кубагӣ Орландо Поланко нерўсанҷӣ кард. Рақобати ҷудокорон то ба сонияҳои тилоӣ рафт ва Эмомалӣ тавонист, ки бо имтиёзи вазарӣ зафар ёбад.
Эмомалии Нуралӣ дар даври 3-юм муқобили Ҳифуми Абеи ҷопонӣ рақобат кард. 2 маротиба чемпиони ҷаҳон, 10 маротиба чемпиони «Grand Slam» ва ғолиби Бозиҳои олимпӣ мебошад. Рақобати Эмомалӣ бо ин ҷудокори варзидаи ҷопонӣ то ба сонияҳои тилоӣ рафт. Ҳарчанд дар раванди рақобат Эмомалӣ ҷароҳат бардошт, аммо таслим нашуд ва то ба охир қаҳрамонона муқобили Абе мубориза бурд. 3 шидо сабаб шуду Эмомалӣ аз идомаи мусобиқа бенасиб монд.
Зери вазни то 73 кг ҷудокори дигари тоҷик Беҳрўз Хоҷазода дар даври аввал дар сонияҳои тилоӣ тавонист, ки бо як вазарӣ Аксус Бенҷамини фаронсавиро шикаст диҳад ва ба даври дуюм барояд. Дар даври дуюм Хоҷазода бо Виктор Стерпуи 23-сола аз кишвари Молдова сабқат кард ва бо натиҷаи иппон мағлуб шуд.
Муҳаммадраҳим Сарахонов дар даври аввал аз Нилс Стампи швейтсарӣ мағлуб шуд ва аз идомаи мусобиқа бенасиб монд.
Сомон Маҳмадбеков дар вазни -81 кг дар даври аввал бо намояндаи Канада Франкойс Гаузейр бо имтиёзи вазарӣ пирўз шуд. Дар даври дуюм аз Шарофиддин Болтабоеви ўзбек бо 3 шидо рақобатро бохт.
Шодмон Ризоев дар ин вазн рақобатҳоро дар даври дуюм оғоз кард. Ҳарифаш Ашраф Моутили марокашӣ буд, ки бо имтиёзи иппон муқобили Шодмон зафар ёфт.
Комроншоҳи Устопириён дар вазни -90 кг дар даври аввал бо Ивайлов Иванов аз Булғористон мубориза бурд ва бо як вазарӣ мағлуб шуд.
Ҷаҳонгир Маҷидов дар ҳамин вазн дар даври аввал озод буд ва дар даври дуюм бо 3 шидо дар вақти тилоӣ рақобатро ба Станислав Гунченко аз Украина бохт. Абўбакри Акобир зери вазни то 100 кг дар даври аввал озод буд ва дар даври дуюм аз ҷудокори испанӣ Николоз Шеразадишвили бо се шидо сарафканда шуд.
