Беҳрӯз Хоҷазода аз рӯйи чанд намуди варзиш тамрин мекунад
Беҳрӯз Хоҷазода аз рӯйи чанд намуди варзиш тамрин мекунад
Беҳрӯз Хоҷазода яке аз беҳтарин гӯштигирони самбо, дзюдо, кураши тоҷик аст, ки ҷоизадори чемпионати Тоҷикистон ва ҷаҳон оид ба самбо мебошад.
Ин паҳлавони тоҷик 11-уми январи соли 1995 дар ноҳияи Варзоби Ҷумҳурии Тоҷикистон дар оилаи корманди Прокуратураи генералии Ҷумҳурии Тоҷикистон Хоҷазода Саъдулло Саид ба дунё омада, мактаби миёнаи №3 ба номи Бобоҷон Ғафурови деҳаи Ҳушёрии ноҳияи Варзобро хатм кардааст. Ҳанӯз аз сини 11-солагиаш зери роҳбарии Садриддин Обидов ба тамрини гӯштии тарзи самбо машғул шудааст. Баъд аз хатми мактаби миёна Беҳрӯз Хоҷазода ба факултети омодагии дифои ҳарбӣ ва варзиши Донишкадаи тарбияи ҷисмонии Тоҷикистон ба номи С. Раҳимов дохил шуд.
Хоҷазода аввалин дастоварди байналмилалиашро моҳи майи соли 2013 дар чемпионати Осиё, ки дар шаҳри Сеули Ҷумҳурии Корея баргузор шуд, ба даст овард ва ба гирифтани медали биринҷӣ сарфароз гардид.
Соли 2014 дар чемпионати Осиё дар шаҳри Тошканди Ҷумҳурии Ӯзбекистон аз рӯи гӯштии самбои размӣ ба медали биринҷӣ сарфароз гардидааст. Соли 2017 варзишгари ҷавони тоҷик ба дастовардҳои зиёде ноил гашт. Моҳи июли соли 2017 дар Чемпионати Осиё дар шаҳри Тошканд дар вазни 68 кг сазовори ҷои аввал гардид. Моҳи сентябри соли 2017 дар Бозиҳои 5-уми Осиёӣ дар шаҳри Ашқободи Ҷумҳурии Туркманистон дар вазни 74 кг дар гӯштии самбо сазовори медали тилло гардидааст.
Ҳамин тавр, 11-уми ноябри соли 2017 мусобиқоти қаҳрамонии самбои ҷаҳон дар шаҳри Сочии Федератсияи Русия баргузор гардид. Қаҳрамони мо дар вазни зери 74 кило ба майдон баромада, дар қувваозмоии ниҳоӣ бар паҳлавони Беларус Степан Попов пирӯз омад ва ба унвони қаҳрамони ҷаҳон бо гирифтани медали тилло парчами Ҷумҳурии Тоҷикикстонро баланд бардошт. Соли 2019 дар чемпионати ҷаҳон оид ба дзюдо дар Ҷопон мақоми панҷумро касб кард. Ӯ бар дзюдочиёни Муғулистон, Куба, Косово ва Чин пирӯз шуд, вале дар чорякфинал аз паҳлавони озарбойҷонӣ шикаст хӯрд.
Дар қувваозмоии ҷавобӣ Беҳрӯз бар дзюдочии исроилӣ Тоҳар Битбулӣ пирӯз шуд, вале дар мубориза барои медали биринҷӣ аз ҷудукори рус Денис Лартсев шикаст хӯрд. Айни ҳол Беҳрӯз Хоҷазода тамринҳояшро дар тими мунтахаби Ҷумҳурии Тоҷикистон аз рӯи намудҳои гӯштиҳои самбо, ҷудо, кураш ва миллии тоҷикӣ таҳти роҳбарии сармураббии тим Носир Бозоров идома дода истодааст. (Оила.Тж)
