Исфара. Як нафар барои фурӯхтани адабиёти динӣ ҷарима шуд
Суди шаҳри Исфара як нафарро бо гуноҳи фурӯхтани адабиёти динӣ зиёда аз 4 ҳазор сомонӣ ҷарима баст. Гуфта мешавад, ки ин нафар адабиёти динии бидуни иҷозаро фурӯхтааст.
Номи муҷрим дар хабар гуфта намешавад, вале зикр шудааст, ки ӯ дар бозори марказии Исфара ба савдои адабиёте машғул буд, ки “фурӯш ва паҳн карданаш бе ҳуҷҷати расмии диншиносӣ манъ аст.” Номгӯйи адабиёт ҳам гуфта нашудааст.
Гуфта мешавад, ки аз шаҳрванд ҳафт китоб мусодира ва барои нигоҳдорӣ ба Кумитаи дин фиристода шуд: “Вақте адабиёти динӣ бе санҷиш… паҳн мешавад, ин эҳтимол дорад, ки ҳамвора хатарҳои идеологӣ ва экстремистӣ дар байни ҷомеа ҷой мегиранд.”
Мавриди зикр аст, ки дар Тоҷикистон аз соли 2009 фурӯш ва таблиғи адабиёти динии бидуни хулосаи Кумитаи дин манъ аст.
