Тоҷикистон мусобиқаро бо бозӣ бо Малайзия шуруъ мекунад

Ассотсиатсияи футболи Осиёи Марказӣ ҷадвали бозиҳои мусобиқаи «CAFA Nations Cup 2025»-ро, ки аз 29-уми август то 8-уми сентябр баргузор мешавад, эълон кард.

Дастаи мунтахаби Тоҷикистон дар гурӯҳи «В» бо тимҳои миллии Малайзия (29-уми август), Афғонистон (1-уми сентябр) ва Эрон (4-уми сентябр) неру месанҷад. Бозиҳо дар ин чаҳоргона дар шаҳри Ҳисор баргузор мешаванд.

Бозиҳои гурӯҳи «А» бо ширкати дастаҳои Ӯзбекистон, Қирғизистон, Туркманистон ва Уммон дар Ӯзбекистон баргузор мешаванд.

Тибқи муқаррароти Ҷоми миллатҳои CAFA вохӯриҳои марҳилаи гурӯҳӣ дар шакли даврӣ баргузор мешаванд. Сипас, ғолибони гурӯҳҳо дар финал вомехӯранд. Дастаҳое, ки дар гурӯҳҳои худ ҷойи дуюмро мегиранд, барои ҷои сеюм мубориза мебаранд. Бозии ниҳоии мусобиқот дар Тошканд ва бозӣ барои ҷойи сеюм дар Ҳисор ба нақша гирифта шудаанд.