Қаҳрамонии муҳоҷир дар Санкт-Петербург
Губернатори Санкт-Петербург Александр Беглов шахсан ба Хайрулло Ибодуллоев соати губернаторӣ ва медали шуҷоат тақдим кард. Маросими расмӣ дар бинои таърихии “Смольный” баргузор шуд.
Ибодуллоев рӯзи 22 феврал ҷони як кӯдаки ҳафтсоларо, ки аз ошёнаи ҳафтуми бино афтоданӣ буд, наҷот дод. Бар асари ҳодиса кӯдак бо шикастани пой ва осеби узвҳои дохилӣ ба бемористон интиқол ёфт. Ӯ ҳоло дар шуъбаи эҳёгарӣ қарор дошта, ҳарчанд ҳанӯз ба ҳуш наомадааст, табибон вазъи саломатиашро мӯътадил арзёбӣ мекунанд ва ба шифоёбии ӯ хушбинанд.
Худи Ибодуллоев низ ҷароҳат бардошта, дасташ шикаставу чанд дандонаш осеб дидааст. Бо вуҷуди ин, қаҳрамонии ӯ ҷони кӯдакро аз марги эҳтимолӣ наҷот дод.
Пештар ӯ барандаи ҷоизаи ба номи Тигран Кеосаян гардида, як миллион рубли дарёфтнамудаашро ба оилааш дар Узбекистон ирсол кардааст.
Ҳамчунин, Президенти Узбекистон Шавкат Мирзиёев рӯзи 23 феврал фармонеро имзо кард, ки тибқи он Хайрулло Ибодуллоев бо медали давлатии «Ҷасорат» барои «шуҷоат, қаҳрамонӣ ва фидокорӣ» қадрдонӣ гардид.
Гуфта мешавад, ки ӯ чор моҳи охир дар Санкт-Петербург ба ҳайси роҳрӯб кор мекард. Қиссаи далерии ӯ дар ҷомеа вокуниши васеъ ба бор оварда, ҳамчун намунаи инсондӯстӣ ва фидокорӣ истиқбол шуд.
