Варзиши тоҷик дар як ҳафта. Аз медалҳои тилло то ғалабаҳои байналмилалӣ
Дар шаҳри Душанбе мусобиқаи Dushanbe Grand Slam 2026 ба анҷом расид. Дар мусобиқаи мазкур 240 ҷудокори 34 кишвари ҷаҳон ширкат варзиданд.
Тоҷикистонро 40 ҷудокор муаррифӣ карда, ба гирифтани 4 медал ноил шуданд. Эмомалӣ Нуралӣ (-66 кг), Муҳиддин Асадуллоев (-73 кг) ва Сомон Маҳмадбеков (-81 кг) ба гирифтани медалҳои тилло ноил шуданд. Лоиқ Қутбуддинов (-60 кг) соҳиби нишони биринҷӣ гардид.
Ёдовар мешавем, ки соли гузашта дар мусобиқаи Dushanbe Grand Slam 2025 ҷудокорони тоҷик ба гирифтани 11 медал ноил шуда буданд.
Мутахассиси 49-солаи македонӣ Игор Ангеловский сармураббии нави тими миллии Тоҷикистон таъйин шуд. Ӯ дастаро барои қисми ниҳоии Ҷоми Осиё-2027, ки дар Арабистони Саудӣ баргузор мешавад, омода мекунад.
Ба иттилли ФФТ Ангеловский мунтахаби Македонияи Шимолиро роҳбарӣ карда, онҳоро дар соли 2020 бори аввал ба марҳилаи ниҳоии Чемпионати Аврупо баровардааст.
Ин ҳафта дар шаҳри Тошканд мусобиқаи Октагон-86 сурат гирифт. Қувваозмоии асосӣ миёни ду ситораи ММА – Қамараддин Ҳасанов бо тахаллуси Камил Каратэ аз Тоҷикистон ва Отабек Абдумуъминов бо лакаби Сатурн сурат гирифт.
Варзишгари тоҷик дар ин набард бо қарори якдилонаи доварон пирӯз шуд.
2 – юми май мусобиқаи бузурги ҳунарҳои размӣ дар шаҳри Алмаатои Қазоқистон баргузор шуд. Дар ин мусобиқа варзишгари тоҷик Муҳаммадкабир Назарзода бар намояндаи мизбон Бейбарис Занов бо қарори якдилонаи доварон дастболо шуд.
Ин ҳафта чун анъана бозиҳои даври 7-уми Лигаи олӣ сурат гирифт. Ҳангомаи даврро парвоз нишон дод. Шогирдони Тоҳир Муминов дар сафар Хуҷандро 2:0 мағлуб карданд. Бозии марказии давр бо иштироки Вахш ва Истиқлол сурат гирифт.
Дар ин дидор душанбегиҳо бо ҳисоби 2:0 дар сафар пирӯз шуданд. Садрнишини ҷадвал дастаи Артиш ғалабаи муҳими худро дар бозӣ бо Истаравшан ба даст овард. Регар ТадАЗ 4:1 дар сафар бар Бақрчӣ, Ҳосилот дар майдонаш 1:0 бар Равшан, Эсхата 4:2 бар Сардор дастболо шуданд.
