Ширкати 12 паҳлавони тоҷик дар Ulaanbaatar Grand Slam 2025
Аз 25 то 27-уми июли соли равон дар шаҳри Уланбатори Муғулистон мусобиқаи навбатии сайри ҷаҳонии ҷудо дар соли 2025 Ulaanbaatar Grand Slam 2025 баргузор мешавад, ки 12 ҷудокори тоҷик дар он ширкат хоҳанд кард.
Федератсияи байналмилалии ҷудо (IJF) хабар медиҳад, ки барои ширкат дар мусобиқаи Ulaanbaatar Grand Slam 2025 ҳоло 158 ҷудокор (105 мард, 53 зан) аз 26 кишвари ҷаҳон номнавис шудаанд. Тоҷикистонро дар мусобиқаи мазкур 12 паҳлавон миёни мардон – Муллораҷаб Халифаев (-66 кг), Ёсин Бобокалонов (-66 кг), Муҳиддин Асадуллоев (-73 кг), Сунатулло Мусоев (-81 кг), Умедҷон Раҷабов (-90 кг), Мизробшо Лоиқов (-90 кг), Муҳсин Малаев (-100 кг), Кароматулло Ҳакимов (-100 кг), Мансур Раҳмон (+100 кг) ва миёни бонувон Александра Кан (-57 кг) ва Виктория Киселёва (+78 кг) муаррифӣ мекунанд.
Дар рӯзи аввал, 25-уми июл ҷудокорон дар вазнҳои -60 кг, -66 кг миёни мардон ва вазнҳои – 48 кг, -52 кг, -57 кг миёни бонувон рақобат мекунанд. Дар рӯзи дуюм мардон дар вазнҳои 73 кг, -81 кг ва бонувон дар вазнҳои -63 кг, -70 кг сабқат мекунанд. Дар рӯзи охири мусобиқа мардон дар вазнҳои – 90 кг, -100 кг, +100 кг ва бонувон дар вазнҳои -78 кг, +78 кг баромад мекунанд. Оғози рақобатҳо ҳоло дертар маълум хоҳад шуд.
Ёдовар мешавем, ки дар охирин мусобиқаи Ulaanbaatar Grand Slam ҷудокори мо Обид Ҷебов (-66 кг) ба гирифтани медали нуқра шарафёб гардида буд.
