Нархи патент зиёд мешавад?
Нархи патент зиёд мешавад?
Аз Соли Нав нияти сафар ба Русияро дорам. Бародарам мегӯяд, ки нархи патент барои муҳоҷирони корӣ дар Москва зиёд мешавад, вале дар ин бора ахбори муътамад наёфтам. Мехоҳам дар ин маврид равшанӣ андозед.
- Дар соли 2023 нархи патент (иҷозатномаи корӣ) барои муҳоҷироне, ки дар Москва кор мекунанд, то ба 6600 рубл меафзояд. Дар ин бора Даря Мурченко, муовини сардори Раёсати сиёсати иқтисодӣ ва рушди Маскав, сардори шуъбаи таҳлили андоз дар як нишасти Думаи шаҳри Маскав хабар додааст. “Дар соли 2022 маоши расмии муҳоҷирони корӣ дар фаъолияти ҳамешагии онҳо 11,5% афзоиш ёфтааст. Дар робита ба ин, пешниҳод мешавад, ки арзиши патент мутаносибан дар як моҳ то 6600 рубл зиёд карда шавад”,- шарҳ дод Мурченко. Имсол нархи патент дар шаҳри Москва барои хориҷиён моҳона 5900 рубл арзиш дошт. Гуфта мешавад, ки афзоиши арзиши патент ҳаҷми даромади пойтахти Федератсияи Русияро 3 миллиард рубл зиёд мекунад. Маблағи патент пурра ба буҷаи Масква меравад. Қаблан мақомоти чанд минтақаи дигари Русия аз болоравии нархи патент дар соли 2023 хабар дода буданд. Масалан, дар Санкт-Петербург ва вилояти Ленинград арзиши он аз 4200 то 4400 рубл дар як моҳ афзоиш хоҳад ёфт. Хориҷиёне, ки дар вилояти Самара кор мекунанд, бояд аз соли оянда 5720 рубл падохт кунанд, дар ҳоле, ки арзиши он ҳоло 4419 рубл аст.
Байни Вазорати меҳнат, муҳоҷират ва шуғли аҳолии Тоҷикистон ва Корхонаи воҳиди давлатии федералии “Хадамоти шиноснома ва раводид”-и Вазорати корҳои дохилии Русия Ёддошти тафоҳум ба имзо расид.
Санади мазкур ахиран пас аз вохӯрии муовини вазири меҳнат, муҳоҷират ва шуғли аҳолӣ Шаҳноза Нодирӣ бо муовини директори генералии КВДФ “Хадамоти шиноснома ва раводид”-и ВКД-и Русия ба имзо расидааст.
Зикр гардидааст, ки таъсиси намояндагии КВДФ “Хадамоти шиноснома ва раводид” дар Тоҷикистон ба шаҳрвандони кишвар барои гузаштани бақайдгирии изи ангушт ва гирифтани патент ҷиҳати амалӣ намудани фаъолияти меҳнатӣ, шаҳодатнома оид ба донистани забони русӣ ва асосҳои қонунгузории Русия пеш аз сафар ба ин кишвар мусоидат менамояд.
Гуфта мешавад, ки ин вохӯрӣ бо мақсади роҳандозии ҳамкорӣ барои баррасии имкониятҳои таъсиси намояндагии “Хадамоти шиноснома ва раводид” баргузор шудааст. Инчунин, зимни вохӯрӣ масъалаҳои рушди минбаъдаи ҳамкориҳо дар соҳаи муҳоҷират, мусоидат ба рушди муносибатҳои дуҷониба байни Хадамоти муҳоҷират, муассисаҳои давлатии “Марказҳои машваратӣ ва омодагии муҳоҷирони меҳнатӣ пеш аз сафар” дар шаҳри Душанбе, “Агентии бокортаъминкунӣ дар хориҷа” ва КВДФ “Хадамоти шиноснома ва раводид” баррасӣ гардидаанд.
