МархIаба, мархIаба...

МархIаба, хIасратаб рекIелъе тIураб,

ТIолго МухIаммадил ﷺ уммат бохараб,

МархIаба, хIеренаб, гьуинаб калам,

ГьоцIолъун диналъулъ бессизабурал.

МархIаба, мажгитал, нухал, кьоязе

Кьолеб рухIалда жал барахщичIезе,

МархIаба, бацIцIадаб лъадал къулгIаде,

Къуватгун жаналда жигар лъуразе.

МархIаба, бесдалал, язихъал цIехон,

Садакъаялъул квер кодоб кьуразе,

Кьеян гьардолезе барахщичIезе,

ЗагIиплъун ккаразе квербакъулезе.

МархIаба, берцинго тарбия-лъай кьун,

Лъимал исламалде тIоритIулезе,

Мадрасазде хьвадун, мугIалимазухъ,

Берцинго гIин барал мутагIилазе.

МархIаба, вагIзабаз гIакълабиги кьун,

ЖамагIат бачунел дибирзабазе,

Дунялгун ахират бацIцIад гIуцIулел,

ГIелму-гIамал ккурал гIалимзабазе.

МархIаба, кодоре чIумалги росун,

Какикьжоялда тIад вирд тIубалезде,

Радал-бакъанида Къуръанги цIалун,

Хваразде зиярат гьабун унезде.

МархIаба, хъизан-рукъ рекъон хьихьизе,

Гъазават босулел муъминзабазе,

ХIалалаб магIишат нухда бачунел,

Алжаналъул маккал - муъминатазе.

МархIаба, рухIияб диналъул кIалгIа,

КIвараб жигар бахъун балел ругезе,

Садакъа-хайраталъ кумек гьабулел,

Кинаб къо кканиги хIадур ратулел.

МархIаба, гъутIби чIун, мажгиталъул рукъ,

РухIияб кIалгIаде сверизабулел,

КIудияб кириги кодобе босун,

Ахират къачIалел къадахъабазе.

Нужер рекIел къасдал, бацIцIадаб ният,

Аллагьасе гIоло гьабураб гIамал,

Абадияб рокъоб алжан къачIазе,

Къабуллъун батаги БетIергьанасе.

ХIава Таймасханова