Замана хисун гьечIо
Замана хисун гьечIо
Замана хисун гьечIо,
Хисулел руго нилъго.
Кинабго гьарза буго,
Гьеб нилъей гIолеб гьечIо.
Дин-ислам рагьун буго,
Иман загIиплъун буго.
ВагIзаби гIемер руго,
ГIин тIамулел дагь руго.
Тун руго нилъ эркенго,
Кинабго гьарза буго.
КидаллъагIан гьадинан,
Тезе ругеб лъаларо.
Лъалев БетIергьан вуго,
Гьесде буго гьариги,
Дур загIипал лагъзал ниж,
Риччаге балагьалин.
Ракъигун къечалдаса,
Дуца цIуне, БетIергьан.
Кинниги нижеда гьеб,
ГьечIо кIвезе хIехьезе.
ХIалихьатал гIамалал,
Дуда рихьула, Аллагь.
ГIамалал рорцинчIого,
Дур цIоб цебе ккезабе.
Иблисалъ кодой росун,
Напсалъ кверщелги гьабун.
Гьаваялда нахъ ругин,
ГурхIа, РахIман, нижеда.
Дур лагъзалгун дагIбадун,
Доздехун гъибат гьабун,
Рияъ-сумгIги гIемерлъун,
ГIумру тIамулеб буго.
ЖахIда-хIусудги гьабун,
ГьечIел гIайибалги чIван,
ГIадамал какулаго,
Унел къоялги руго.
Кинниги нижер къасдал,
КъваригIел гьечIебги тун,
Тавбу гьабун, ракI бухIун,
ХIарамаб рехун тезе.
Рихьдае жиб гьабулеб,
Гьабиларо гIамалги.
ГIадан къварид гьавулеб,
КъагIида жибго тела.
Напсалда тIадги хIалтIун,
ХIилла-рекIкI биччаларо.
ХIалхъублъи нахъе рехун,
Бугьтаналги лъеларо.
Дуца тавпикъ кье, Аллагь,
Кьурал къоял инегIан,
Мун разияб гIамалгун,
ГIибадатги гьабизе.
Гьаб ракьалда рижарал,
ЗагIипал лагъзал ругин.
Дур гIатIидаб цIобги лъун,
ЦIуне, Аллагь, Дуца ниж.
