ГъазимухIаммадил зияраталда

Нухлулав, лъалхъанищ
Гьаб свериялда?
Сапаралъ вахъарав
Генув щолелъул.
ЩвечIелищ ракIалде
Дол гъазизаби,
Гъазаваталъ хварал
Дагъистан цIунун.
РагIичIебищ дуда
Зикрудал гьаракь,
Зулмуялде данде
Къеркьон хваразул.

Гьаниб щибаб гамачI,
Кьуру кIалъачIищ?
ГъазимухIаммадил
ХIакъикъат бицун.
БалагьичIевищ мун
Гьеб сураталде,
Сабруго къанщарав
ВихьичIищ имам?
Унго, сири бачIищ
ТIолго черхалда,
ТIаде зодов вуссун
ГьабичIищ гьаракь?

Гьеб берцинлъиялъе
Бахъараб гуро,
Цебе заманалъул
Зани буго гьеб.
ГьитIинаб Дагъистан
Гучаб Россиялъ
Кьалде ахIиялъул
ХIакъикъат хъвараб.
Кьварарал муридаз
РухI босулелъул,
Биялъ къанда тараб
Тарих гурищ гьеб?

АБУМУСЛИМ МУХIАММАДОВ, ГъазимухIаммад имамасул зиярат ТIЕЛЕКЬ РОСУ