ГIасруялъул къутIбуясде

Аллагь, дир къасд ккана къутIбу рехсезе
Къудрат духъ бугелъул, гьабе дий кумек.
Гьесул тIабигIатгун гIамал берцинлъи,
Бицине гьунар кье, гьардарав Аллагь.

Устар, дур гIелмуялъ пана гьарурал
Гьунар бугел чагIи гIемерал ккана.
ГIелмуги гIамалги рекъезабурав,
Муршид мун вукIиналъ ракIал гвангъана.

РекIел гъварилъуде жанир рортулел
РагIаби рихьараз хьуллъун цIалула.
ЦIаларав чиясул черх сородулел,
Сирриял магIнабаз магIу чвахула.

МагIна жаниб бугел тIахьал раккидал,
ТIолго гIелмуялъул цIуна Дагъистан.
ЦIализе бокьараб кьер-кьераб тайпа,
Кьун буго Аллагьас гьаб гIаламалъе.

Гьалагал чурхдузда чIолохъжо базе,
Чанги мисал буго дуца бачараб.
Бечедал, мискинал кантIизарулеб,
Канаб шагьри-моцIалъ цIун буго дунял

Аллагьасе гIоло къеркьолел квераз,
Къуръаналъул бицун чанги тIехь хъвана.
Халкъалда гурхIулел рахIмуял бераз,
РахIат гьабичIого рорчIана сардал.

Дур балагьараб бер, босараб гали
Берцинго бихьана бахьи кьуразда.
Бахьинаб гьурмаде ралагьаразги,
Берзул магIу чвахун чучана керен.

Вихьарав чиясул хьул буссунареб,
Берцинаб тIабигIат тIубан ккана дулъ.
ТIогьоде найилгIан гIишкъу бергьунеб,
Гьайбатаб нур ана ахираталде.

Тохтуразухъе ун жал сахлъуларел
Курмузе дараби дуца гьаруна.
КигIан тIад чIаниги жал хIеккунарел,
РакIал тавважугьалъ тамах гьаруна.

ГIадан валагьизе урхъараб гьумер,
Адаб тей ккеладай дур бицун хъвани.
Веццизе рес гьечIеб хIалалъул инсан,
ХIакъикъат дур хъвазе дир гьечIеб гьунар.

РАМАЗАН МУХIАМАДОВ, КIУЯДА РОСУ.