Школалъе баркала

Дир школа лъугIана, лъагIелал ана
Амма дол лахIзатал рекIелъ цIунана,
Дие дарсал кьурал, сабру гьабурал
Кьеги мугIалимал, гIумру нужее.

Къисматалъул нухда гIемер халлъарал
ЛъикIал дарсал лъурал рохун таги нуж,
Жакъа къо щвезегIан, дие хIажатаб
ХIакъаб нух бицарал, цолъун таги нуж.

Нужгун къацандулеб къадараб гIамал,
ГIолилазулъ камун кинго букIинищ,
Кинан букIаниги, Карим БетIергьан,
Киназего гIакълу камил гьабун кье. 

Нижеда кколаан гьанир рукIинин,
КIвар гьабун цIалдезе замана гIелин,
ГIорлъун чвахун хехго гIумруги ана,
Араб заманаги нахъбуссинаро.

Кьурал дарсал цIале, диналъул вацал,
Цоцалъ журан рукIа, диналъул яцал,
Абадаб кепалда, цоцада цадахъ,
Кидаго дунялалъ толарелин нуж. 

Бергьараб гьунаралъ, лъикIаб гIамалалъ,
ГIадан борхалъуде вахинавула,
Воре, гьудулзаби, замана цIуне,
ЦIалдохъаби рукIин рекIелъе биччай.

РакI унтун малъулеб лъималазда дарс,
Доскаялда хъвалел хъахIал мисалал,
Метер школа лъугIун нахъе арабго,
Инагьдиялъ нилъей щибго кьоларо.

Босе, гьанже салам, дир росуцоял,
Цолъун цадахъ хIалтIе, ТIелекь жамагIат,
ГIумруялъ рукIина ракIал школалда,
ГIашикълъун тIамила сардалгун къоял.

Дие бокьун буго баркала кьезе,
Берцинаб школалъул хIалтIухъабазе,
ХIажимурад, дуйги, директорасе,
Даимаб дандрилълъин давлалъун кьеги.

Дида тIаса лъугьа, лъимер вукIана,
КIвараб цIали гьабун гьуин вукIинчIо,
Гьеб гъалатI тIалибаз тIокIаб биччаге,
ТIубан тIаде босун берцинго цIалде.

ШАМИЛ, ТIЕЛЕКЬ РОСУ