Рагъде унел васазул хитIаб

Рагъде унел васазул хитIаб

Нилъер ВатIаналде 
ТIаде къо ккедал,
КъватIире рахъарал
ГIолохъаби ниж.
ГIагараб ракьалда 
Эркенлъи цIунун,
ЦIадул кор боркьараб 
Рагъде арал ниж.
Улкаялда рекъел 
БукIине бокьун,
Бухьараб сапарин 
Дур васалаца.
Хъизан-лъималазе,
Эбел-инсуе,
Росдал агьлуялъе,
Гьабуна къо-лъикI.
Къадар БетIергьанас
Нижер щивасе,
Батила хIадурун
НекIого хъвараб.
Хъвараб хIукмуялда
Разиял руго.
РорчIизе гьелдаса
ГьечIо цоги нух.
Хирияв, БетIергьан,
Гьарула Дуда,
Халкъалъ рогьо балеб,
Биччаге тIаде.
ТIадегIанав, Аллагь,
Гьаре Дуца ниж,
Дагъистан чIухIарал
БахIарзазда гъорлъ.
Рагъул майданалда
Гьалмагълъиги тун,
Гьениса лъутулел
Ратугеги ниж.
РекIелъ хIинкъи бачIун,
Рахчун чIолезул,
Чорокаб гIамалги
Гьабизе тоге.
Тушман гIагарлъидал
Квералги рорхун,
Кверде жал унезул
Кьеразулъ хъваге.
ГIагараб Дагъистан!
Дур васал ругин,
ДугIадулъ рехсезе,
Воре, кIочонге!
КIудияб къварилъи
ТIаде бачIиндал,
Бусурбанчиясул
Ярагъ бугин гьеб.
БетIергьанас дугIа
Къабул гьабеги.
Къабулаб гIужалде
Данде гьеб ккайги.
Ниж рагъде унилан,
Къварид рукIунге.
РекIелъе пашманлъи
Лъугьине тоге.
РукIана некIоги
Рагъал гIемерал.
РитIана улбуца
Васал гьенире.
Гьанже ирга буго
Нижеде бачIун,
РегIизе нухда ниж,
Нух битIагиян.
Бичас рагъда хвезе
Къадар батани,
Бахъугеги иман
РухI бахъулелъул.
Берал къанщулелъул
Къадирас нижей,
Шагьадат битIизе
ТIинкIайги рекIелъ.
Рокъоре руссине
Къисмат батани,
БахIарзал гIадинан
РачIина нахъе.
Биччаларо лъезе
ЛъикIаб гьечIеб тIанкI,
ГьитIинаб Дагъистан
Дур гьеб цIаралда.
ЦIунила борхатго
ВатIаналъул цIар,
ТIабигIаталъ кьвари
Кьурал васалаз.
Кьварарал умумуз
Ирсалъе тараб,
Теларо бортизе
Дур къадру-къимат.
Къо-мех лъикI, Дагъистан,
Унел руго ниж.
Аллагьасде буго
Гьанже аманат.
Жакъа арал гIадин,
Чи камичIого,
БачIаги нилъеде
ДандчIвалеб къоги.

МухIаммад Ражабов, ТIелекь росу